இந்தியாவில் வேகமாக அதிகரிக்கும் அந்நிய நேரடி முதலீடு: மத்திய அமைச்சா் பியூஷ் கோயல் தகவல்

‘அந்நிய நேரடி முதலீடுகள் இந்தியாவில் வேகமாக அதிகரித்து வருகிறது, இது விரைவான பொருளாதார வளா்ச்சி மற்றும் லட்சக்கணக்கான புதிய வேலை வாய்ப்புகளை உருவாக்குகிறது’ என மத்திய வா்த்தக, தொழில்துறை அமைச்சா் பியூஷ் கோயல் ஞாயிற்றுக்கிழமை தெரிவித்தாா்.

தில்லியில் நடைபெற்ற செய்தியாளா்கள் சந்திப்பில் பியூஷ் கோயல் கூறியதாவது: வலுவான உள்நாட்டு வா்த்தகம், திறமையான தொழிலாளா்கள் மற்றும் சட்டத்தின் ஆட்சி காரணமாக உலகளாவிய முதலீட்டாளா்கள் இந்தியாவில் அதிக ஆா்வம் காட்டி வருகின்றனா்.

மத்திய கிழக்கு நாடுகள், ஐரோப்பா, ஜப்பான் மற்றும் அமெரிக்கா போன்ற நாடுகள் இந்தியாவை சிறந்த முதலீட்டு இடமாக பாா்க்கின்றன. இந்தியாவின் நிலையான விதிமுறைகள் மற்றும் வணிக கொள்கைகள் உலகம் முழுவதிலும் இருந்து முதலீட்டாளா்களை ஈா்க்கின்றன.

அமெரிக்க முதலீட்டு நிதியத்தின் தலைமை நிா்வாக அதிகாரி ஒருவரை கடந்த மாதம் சந்தித்தபோது, இந்தியாவில் கடந்த 10 ஆண்டுகளில் செய்த தங்களது முதலீடுகள் மிகச் சிறந்தவை என அவா் தெரிவித்தாா். அவா்களது முதலீடுகளில் 80 சதவீதத்துக்கும் அதிகமானவை சமீபத்தில் நடந்துள்ளன. இது இந்தியா வேகமாக வளா்ந்து வருவதை எடுத்துக்காட்டுகிறது.

பங்குச் சந்தை ஈா்ப்பு: உலகளாவிய நிச்சயமற்ற தன்மைகள் இருந்தபோதிலும், இந்திய பங்குச் சந்தையின் வலுவான செயல்திறன் அதிக வெளிநாட்டு நிறுவன முதலீட்டாளா்களை ஈா்த்து வருகிறது. இதனால், ஜனவரி முதல், சராசரியாக 4.5 பில்லியன் டாலருக்கும் (சுமாா் ரூ. 36,900 கோடி) அதிகமான மாதாந்திர அந்நிய நேரடி முதலீட்டை இந்தியா பெற்றுள்ளது.

முதலீட்டு வளா்ச்சி: நடப்பாண்டு ஜனவரி முதல் செப்டம்பா் வரையிலான காலகட்டத்தில் அந்நிய நேரடி முதலீடுகள் சுமாா் 42 சதவீதம் அதிகரித்து 42.13 பில்லியன் டாலராக (சுமாா் ரூ. 3.45 லட்சம் கோடி) உள்ளது. இது கடந்த ஆண்டு இதே காலகட்டத்தில் 29.73 பில்லியன் டாலராக (சுமாா் ரூ. 2.43 லட்சம் கோடி) இருந்தது. 2024-25 நிதியாண்டின் முதல் அரையாண்டில், முதலீடுகள் 45 சதவீதம் அதிகரித்து 29.79 பில்லியன் டாலராக (சுமாா் ரூ. 2.44 லட்சம் கோடி) உள்ளது.

பிரதான துறைகள்: இந்த முதலீடுகளை ஈா்க்கும் முக்கிய துறைகளாக மென்பொருள் சேவைகள், தொலைத்தொடா்பு, வா்த்தகம், கட்டுமானம், ஆட்டோமொபைல், ரசாயனங்கள் மற்றும் மருந்துகள் ஆகியவை உள்ளன. இதில் பெரும்பாலான துறைகளில் அந்நிய நேரடி முதலீடு நேரடிாக அனுமதிக்கப்படுகிறது. அதே நேரத்தில் தொலைத்தொடா்பு, ஊடகம், மருந்துகள் மற்றும் காப்பீடு போன்ற துறைகளில், வெளிநாட்டு முதலீட்டாளா்களுக்கு அரசு ஒப்புதல் தேவைப்படுகிறது.

இந்த முதலீடுகள் இந்தியாவின் உள்கட்டமைப்பு வளா்ச்சி, சமநிலை மற்றும் ரூபாயின் மதிப்பு ஆகியவற்றுக்கு முக்கியமானவை. நாட்டில் லட்சக்கணக்கான வேலை வாய்ப்புகளை இந்த முதலீடுகள் உருவாக்குகின்றன. இது நாட்டின் வளா்ச்சிக்கு உறுதியளிக்கிறது என தெரிவித்தாா்.