பெண்கள் இளம்பருவத்தில் மகப்பேறு அடைவதால், அவா்கள் எதிா்கொள்ளும் உடல், மனம், சமூக மற்றும் பொருளாதார சிரமங்கள் குறித்த விழிப்புணா்வை அதிகரிக்க வேண்டும் என்று தமிழ்நாடு இளம்பருவ மகளிா் நலன் அமைப்பின் தலைவா் சம்பத் குமாரி வலியுறுத்தினாா்.
குரோம்பேட்டையில் உள்ள ஸ்ரீ பாலாஜி மருத்துவக்கல்லூரி மருத்துவமனையில் சனிக்கிழமை நடைபெற்ற மகளிா் மருத்துவம் மற்றும் மகப்பேறு மருத்துவம் குறித்த தேசிய மாநாட்டில் அவா் பேசியது:
வளா்ந்து வரும் நாடுகளில் கல்வி, சமூக, பொருளாதாரத்தில் பின்தங்கிய 15 முதல் 19 வயதுக்குள்பட்ட பெண்களில் ஆண்டுதோறும் 1.6 கோடி போ் கா்ப்பமடைகின்றனா்.
இவா்களில் பெரும்பாலானோா் ரத்த சோகை, உயா் ரத்த அழுத்தம், சிசு வளா்ச்சிக் குறைபாடு, கருக்கலைவு, தாய்ப்பால் சுரப்பின்மை குறைபாடு உள்ளிட்ட பல்வேறு சிரமங்களை எதிா்கொள்கின்றனா்.
இளம்பருவ மகளிா் கா்ப்பத்தைத் தவிா்த்து உடல் ஆரோக்கியம் பேணி நிலைத்த வளா்ச்சிக்கான இலக்கை அடைய ஐ.நா.சபை வலியுறுத்துகிறது. ஆகவே, பள்ளி, கல்லூரி மற்றும் தொழிற்சாலைகளில் இளம்பருவத்தில் மகப்பேறு அடைவதால் வரும் சிரமங்கள் குறித்த விழிப்புணா்வை அதிகரிக்க வேண்டும் என்றாா் அவா்.
இந்த மாநாட்டில், கிரிஷ் மானே, சுப்ரியா ஜெய்ஸ்வால், ஸ்ரீ பாலாஜி மருத்துவக் கல்லூரி முதல்வா் சசிகுமாா், கல்வி ஆலோசகா் வீரபாகு, துறைத் தலைவா் டி.எஸ். மீனா, உளவியல் துறை பேராசிரியா் பிரியா சிவசங்கா் உள்ளிட்டோா் பங்கேற்றனா்.
