உங்களைத் தேடி உங்கள் ஊரில் திட்டம்: அலுவலா்கள் ஒருங்கிணைந்து பணியாற்ற வேண்டும்

உங்களைத் தேடி உங்கள் ஊரில் திட்டத்தின் கீழ் பொதுமக்கள் அளிக்கும் கோரிக்கைகளை நிறைவேற்ற, அலுவலா்கள் ஒருங்கிணைந்து பணியாற்ற வேண்டும் என்று கள்ளக்குறிச்சி மாவட்ட ஆட்சியா் எம்.எஸ்.பிரசாந்த் தெரிவித்தாா்.

உங்களைத் தேடி உங்கள் ஊரில் திட்டத்தின் கீழ், உளுந்தூா்பேட்டை வட்டத்தில் மாவட்ட ஆட்சியா் மற்றும் அனைத்துத் துறை அலுவலா்கள் புதன்கிழமை பல்வேறு பகுதிகளில் ஆய்வு மேற்கொண்டனா்.

ஆதனூரில் திடக்கழிவு மேலாண்மைத் திட்டத்தின் கீழ் கிராமப்பகுதிகளில் மேற்கொள்ளப்பட்டு வரும் தூய்மைப் பணிகள், மேட்டுப்பாளையம் கிராமத்தில் திடக்கழிவு மேலாண்மைத் திட்டத்தின் கீழ் குப்பைகள் தரம் பிரிக்கும் மையத்தின் பணிகள், மேலும் அங்குள்ள குழந்தைகள் நல மையத்தின் செயல்பாடுகள் ஆகியவற்றை மாவட்ட ஆட்சியா் எம்.எஸ்.பிரசாந்த் பாா்வையிட்டு ஆய்வு மேற்கொண்டாா்.

இதுபோன்று, திருநாவலூா் ஒன்றியம், காம்பட்டு ஊராட்சி கிளை நூலக கட்டுமானப் பணிகள், பாண்டூா் அரசு உயா்நிலைப் பள்ளியில் கழிப்பறை அமைத்தல் பணி, உடையநத்தம் கெடிலம் ஆற்றில் நபாா்டு திட்டத்தின் கீழ் ரூ.14 கோடியில் கட்டப்பட்டு வரும் உயா்மட்ட பாலத்தின் கட்டுமானப் பணிகள், உளுந்தூா்பேட்டை நகராட்சியின் குப்பை சேகரிக்கும் கிடங்கின் பணிகளைப் பாா்வையிட்ட ஆட்சியா், இதுகுறித்த விவரங்களைக் கேட்டறிந்தாா்.

மேலும் பொதுப் பணித் துறை மூலம் உளுந்தூா்பேட்டையில் ரூ.4.37 கோடியில் கட்டப்பட்டு வரும் ஆய்வு மாளிகை கட்டுமானப் பணிகள், ரூ.4.94 கோடியில் நடைபெற்று வரும் உளுந்தூா்பேட்டை அரசு மகளிா் மேல்நிலைப் பள்ளி புதிய கட்டடப் பணிகள், ரூ.20 கோடியில் உளுந்தூா்பேட்டை அரசு மருத்துவமனையில் நடைபெற்று வரும் அவசர சிகிச்சைப் பிரிவு கட்டுமானப் பணிகளை பாா்வையிட்ட ஆட்சியா் பிரசாந்த், பணிகளை குறித்த காலத்துக்குள் முடிக்க வேண்டுமென அலுவலா்களை அறிவுறுத்தினாா்.

மேலும், உங்களைத் தேடி உங்கள் ஊரில் திட்டத்தின் கீழ் பொதுமக்கள் அளிக்கும் கோரிக்கைகளை நிறைவேற்ற, அலுவலா்கள் ஒருங்கிணைந்து பணியாற்ற வேண்டும் என்று ஆட்சியா் அறிவுரை வழங்கினாா். ஆய்வில் பல்துறை அலுவலா்கள் பங்கேற்றனா்.