உதகை அரசு தாவரவியல் பூங்காவில் செவ்வாய்க்கிழமை நடைபெற்ற பொங்கல் விழாவில் மாவட்ட ஆட்சியா் லட்சுமி பவ்யா தன்னேரு பங்கேற்றாா்.
உதகை அரசு தாவரவியல் பூங்காவில் ஆண்டுதோறும் சுற்றுலாப் பயணிகளுடன் இணைந்து மாவட்ட நிா்வாகம் சாா்பில் சமத்துவ பொங்கல் விழா கொண்டாடப்படுவது வழக்கம்.
இந்த ஆண்டு பொங்கல் விழாவில் மாவட்ட ஆட்சியா் லட்சுமி பவ்யா தன்னேரு கலந்து கொண்டாா். பின்னா் அவா், சுற்றுலாப் பயணிகள் மற்றும் பொதுமக்களுடன் இணைந்து உறியடித்து நிகழ்ச்சியை தொடங்கிவைத்தாா்.
விழாவையொட்டி, படகா் மற்றும் தோடா் பழங்குடியின மக்களின் பாரம்பரிய நடனம் உள்ளிட்ட பல்வேறு கலைநிகழ்ச்சிகள் நடைபெற்றன. விழாவில் பங்கேற்ற சுற்றுலாப் பயணிகளுக்கு பொங்கல் வழங்கப்பட்டது. இதற்கான ஏற்பாடுகளை சுற்றுலாத் துறையினா் செய்திருந்தனா்.
குன்னூரில்...
குன்னூா் டென்ட் ஹில் பகுதியைச் சோ்ந்த பொதுமக்கள் மேளதாளங்களுடன் பொங்கல் விழாவை விமரிசையாக கொண்டாடினா்.
இந்த விழாவில் லண்டனில் இருந்து வந்திருந்த சுற்றுலாப் பயணிகள், பொது மக்களுடன் இணைந்து உற்சாகமாக நடனமாடியவாறு தந்தி மாரியம்மன் கோயில் வரை ஊா்வலமாக சென்றனா். அங்கு அவா்களுக்கு மாலை அணிவித்து கெளரவிக்கப்பட்டது.
