"எங்களுக்கு 5 கடைங்க; ஒரு நாளுக்கு 650 லிட்டர் பால் வியாபாரம்"- அசத்தும் திருப்பத்தூர் சீனு பால் கடை

திருப்பத்தூர் பஜார் தெரு...

காலையில் இருந்து செய்த தீபாவளி ஷாப்பிங் சற்று டயார்ட் ஆக்க, 'ஒரு டீ அடிக்கலாம்' என்று அந்தத் தெருவில் இருந்த 'சீனு பால் கடை'க்குள் நுழைந்தோம்.

ஒரு டீ சொல்லிவிட்டு, அந்தக் கடையின் உரிமையாளர் சுரேஷிடம் பேச்சுகொடுக்க, "1962-ல எங்க அப்பா பால் வியாபாரம் பண்ணத் தொடங்குனாரு.

இப்போ அதை டீக்கடை வியாபாரமா மாத்தி பண்ணிக்கிட்டு இருக்கோம். இப்போ எங்களுக்கு திருப்பத்தூர்ல 5 டீக்கடை இருக்கு. இந்தக் கடைகள்ல அண்ணன் தம்பிங்க பாத்துக்குறோம்" என்று அவர் கூறிக்கொண்டிருக்கும்போதே, சுடச்சுட டீ வந்துவிட்டது.

"எங்க வியாபாரத்துல பெரிய பலமே ரெகுலர் கஸ்டமர்கள் தான். இவங்க திரும்ப திரும்ப எங்க கடைக்கு வர்றதுக்கு எங்களோட தரமும், சுவையும் தான்.

எங்க வீட்டுல 7-8 பசு மாடுகள் இருக்கு. அதுகளோட பாலும், அப்புறம் வீட்டுல மாடு வெச்சுறக்கவங்க கிட்ட பால் கறந்து வாங்கிட்டு வந்தும் டீ, காபிக்கு பால் பயன்படுத்தறோம். முழுக்க முழுக்க வீட்டு பசு மாடுகளோட பால் மட்டும் தான் எங்க டீ, காபிக்கு பயன்படுத்தறோம்.

அடுத்தது, டீ தூள், காபி தூள் எல்லாம் ஒரிஜினல் தான் பயன்படுத்தறோம்" என்று தொடர்கிறார்.

"நாங்க எங்க கடைகள்ல சுடு தண்ணீக்கு மட்டும் தான் கேஸ் சிலிண்டர் பயன்படுத்துவோம். மத்தப்படி, டீ, காபிக்கு எல்லாமே விறகு கரி தான்" என்பவரிடம் வியாபாரத்தைப் பற்றி கேட்டோம்.

"ஏற்கெனவே சொன்ன மாதிரி எங்களுக்கு 5 கடைங்க இருக்கு. ஒவ்வொரு கடைக்கும் கிட்டத்தட்ட 120-150 லிட்டர் பால் வியாபாரம் ஆகுது. அப்படி பாத்தா 5 கடைகளுக்கும் சேர்த்து ஒரு நாளுக்கு கிட்டத்தட்ட 650 லிட்டர் பால்.

நாங்க டீக்கடைக்கு மாறி 30 வருசம் ஆனாலும், இப்போ வரைக்கும் எங்களுக்கு மக்களோட ஆதரவு குறைஞ்சதே இல்ல.

புதுசா தொழில் செய்ய நினைக்கிறவங்க சுத்தத்தையும், உண்மையையும் கடைப்பிடிச்சாலே நல்ல வளர்ச்சியைப் பார்க்கலாம்.

அடுத்தது இருக்குற இடம் மற்றும் நம்ம பொருளோட தரத்துக்கு ஏத்த மாதிரி கரெக்டா விலை நிர்ணயிக்கணும்.

அப்புறம் ரொம்ப முக்கியமா, மக்களுக்கு எப்படி கொடுத்தா பிடிக்கணும்ங்கறதை நல்லா தெரிஞ்சுகிட்டு, அதை செய்யுங்க. அதுல தரம் ரொம்ப முக்கியம்" என்று புன்னைகையுடன் விடைக்கொடுக்கிறார்.