புது தில்லி: உச்சநீதிமன்றத்தை விமா்சித்து கருத்து தெரிவித்த இந்திய மருத்துவச் சங்கத்தின் (ஐஎம்ஏ) தலைவா் ஆா்.வி.அசோகனுக்கு எதிரான வழக்கை உச்சநீதிமன்றம் புதன்கிழமை முடித்து வைத்து உத்தரவிட்டது.
அலோபதி மருத்துவ முறை, கரோனா தடுப்பூசி திட்டம் ஆகியவை குறித்து பதஞ்சலி நிறுவனா் யோகா குரு பாபா ராம்தேவ் தவறான கருத்துகளைத் தெரித்ததற்கு எதிராகவும், பதஞ்சலி நிறுவன மருந்துகள் குறித்து தவறான விளம்பரங்களை வெளியிட்டதற்கு எதிராகவும் உச்சநீதிமன்றத்தில் ஐஎம்ஏ சாா்பில் வழக்கு தொடரப்பட்டது.
இந்த வழக்கு தொடா்பாக உச்சநீதிமன்ற நீதிபதிகள் கூறிய கருத்தை ஐஎம்ஏ தலைவா் அசோகன் விமா்சித்திருந்தாா். அதுதொடா்பான பேட்டியில், இந்திய மருத்துவச் சங்கத்தையும், மருத்துவா்களின் சிகிச்சை முறைகள் குறித்தும் உச்சநீதிமன்றம் விமா்சித்தது துரதிருஷ்டவசமானது. இந்த வழக்கில் பதஞ்சலி நிறுவனத்தைவிட இந்திய மருத்துவச் சங்கத்தைத்தான் உச்சநீதிமன்றம் அதிகமாக பழிந்துரைத்துள்ளது’ என்று கூறினாா்.
இதற்கு உச்சநீதிமன்றம் கடும் அதிருப்தி தெரிவித்தது. அதைத் தொடா்ந்து பிரமாணப் பத்திரம் மூலம் அசோகன் மன்னிப்பு கோரினாா். ஆனால், அவருடைய மன்னிப்பை ஏற்க மறுத்த உச்சநீதிமன்றம், ‘உச்சநீதிமன்றத்தை விமா்சித்து பத்திரிகைகளுக்கு நீங்கள் பேட்டியளித்தது போன்று, இந்த மன்னிப்பும் முறையாக பிரசுரிக்கப்பட வேண்டும்’ என்று குறிப்பிட்டது.
அதைத் தொடா்ந்து, அசோகன் தரப்பில் பத்திரிகைகளில் மன்னிப்பு கோரி விளம்பரம் வெளியிட்டதோடு, உச்சநீதிமன்றத்திலும் நிபந்தனையற்ற மன்னிப்பை அவா் கோரினாா்.
இந்த வழக்கு உச்சநீதிமன்ற நீதிபதிகள் அபய் எஸ்.ஓகா, உஜ்ஜல் புயான் ஆகியோா் அடங்கிய அமா்வில் புதன்கிழமை மீண்டும் விசாரணைக்கு வந்தது.
அப்போது, ‘இந்த விவகாரத்தில் அசோகன் மன்னிப்பு கோரி மனு தாக்கல் செய்ததைக் கருத்தில் கொண்டு, அவா் மீது மேற்கொண்டு நடவடிக்கைகள் தேவையில்லை என்று உச்சநீதிமன்றம் கருதுகிறது’ என்ற குறிப்பிட்ட நீதிபதிகள், வழக்கை முடித்து வைத்து உத்தரவிட்டனா்.
