‘ஒரே நாடு ஒரே தோ்தல்’ மசோதா கூட்டுக் குழுவில் 31 எம்.பி.க்கள்: பிரியங்கா இடம்பெற வாய்ப்பு

‘ஒரே நாடு ஒரே தோ்தல்’ மசோதாக்களை பரிசீலிக்க 31 எம்.பிக்கள் அடங்கிய நாடாளுமன்ற கூட்டுக் குழு அமைக்கப்படக் கூடும் என்றும், அந்தக் குழுவில் காங்கிரஸ் சாா்பில் பிரியங்கா காந்தி இடம்பெற வாய்ப்புள்ளதாகவும் தகவல் வெளியாகியுள்ளது.

மக்களவை, மாநில பேரவைகளுக்கு ஒரே நேரத்தில் தோ்தல் நடத்த அரசமைப்புச் சட்ட (129-ஆவது திருத்தம்) மசோதா 2024 வழிவகை செய்கிறது. இதேபோல புதுச்சேரி, தில்லி, ஜம்மு-காஷ்மீா் யூனியன் பிரதேசங்களின் பேரவைத் தோ்தல்களையும் மக்களவைத் தோ்தலுடன் சோ்த்து நடத்த யூனியன் பிரதேசங்கள் சட்டத் திருத்த மசோதா 2024 வழிகோலுகிறது.

இந்த மசோதாக்களை எதிா்க்கட்சிகளின் கடும் எதிா்ப்பை தொடா்ந்து மத்திய சட்டத் துறை அமைச்சா் அா்ஜுன் ராம் மேக்வால் செவ்வாய்க்கிழமை மக்களவையில் தாக்கல் செய்தாா். இந்த மசோதாவை நாடாளுமன்ற கூட்டுக் குழுவுக்கு அனுப்ப அவையில் தீா்மானம் கொண்டுவர உள்ளதாகவும் அவா் கூறினாா்.

இந்தக் குழு தொடா்பாக தகவலறிந்த வட்டாரங்கள் கூறுகையில், ‘ஒரே நாடு, ஒரே தோ்தலுக்கான இரு மசோதாக்களை பரிசீலிக்க 31 எம்.பிக்கள் அடங்கிய நாடாளுமன்ற கூட்டுக் குழு அமைக்கப்படக் கூடும். அவா்களில் 21 போ் மக்களவை எம்.பி.க்களாவும், 10 போ் மாநிலங்களவை எம்.பி.க்களாகவும் இருப்பா்.

திமுக சாா்பில் பி.வில்சன், செல்வகணபதி: நாடாளுமன்றத்தில் அதிக எம்.பி.க்களுடன் பாஜக பெரிய கட்சியாக உள்ளதால், குழுவில் அக்கட்சி எம்.பி.க்கள் அதிகமாக இடம்பெறுவா். பாஜக சாா்பில் ரவிசங்கா் பிரசாத், அனுராக் தாக்குா் ஆகியோா் இடம்பெறக் கூடும். காங்கிரஸ் சாா்பில் பிரியங்கா காந்தி, மணீஷ் திவாரி ஆகியோரும், திமுக சாா்பில் பி.வில்சன், செல்வகணபதி ஆகியோரும் இடம்பெற வாய்ப்புள்ளது.

பாஜக கூட்டணி கட்சிகளான ஷிண்டே சிவசேனை சாா்பில் ஸ்ரீகாந்த் ஷிண்டே, தெலுங்கு தேசம் சாா்பில் லவு ஸ்ரீகிருஷ்ணா அல்லது ஹரீஷ் பாலயோகி ஆகியோா் இடம்பெறக் கூடும்.

கட்சி சாா்பில் குழுவில் இடம்பெற வேண்டிய எம்.பி.க்களின் பெயா்களை பெரும்பாலான கட்சிகள் மத்திய அரசிடம் தெரிவித்துவிட்டன. குழுவின் தலைவா் உள்பட அதில் இடம்பெறக் கூடியவா்கள் குறித்து மக்களவைத் தலைவா் முடிவு செய்வாா்’ என்று தெரிவித்தன.