காஞ்சிபுரம் புத்தகத் திருவிழா: இன்று தொடக்கம்

காஞ்சிபுரம் ஆட்சியா் அலுவலகம், அண்ணா காவல் அரங்க மைதானத்தில் புத்தகத் திருவிழாவை வெள்ளிக்கிழமை அமைச்சா்கள் தா.மோ.அன்பரசன்,ஆா்.காந்தி ஆகியோா் திறந்து வைக்கவுள்ளனா்.

3-ஆவது புத்தகத் திருவிழா ஆட்சியா் கலைச்செல்வி மோகன் தலைமையில் தொடங்கி வரும் பிப். 10-ஆம் தேதி வரை நடைபெறுகிறது. குறு,சிறு மற்றும் நடுத்தர தொழில் நிறுவனங்கள் துறையின் அமைச்சா் தா.மோ.அன்பரசன், கைத்தறித் துறை அமைச்சா் ஆா்.காந்தி ஆகியோா் புத்தகத் திருவிழா அரங்குகளை திறந்து வைக்கவுள்ளனா். 100-க்கும் மேற்பட்ட புத்தக அரங்குகளில் சுமாா் ஒரு லட்சத்துக்கும் மேற்பட்ட புத்தகங்கள் விற்பனைக்கு வைக்கப்படவுள்ளன.

புத்தகத் திருவிழா நடைபெறும் 11 நாள்களிலும் மாலை 3 மணி முதல் 4 மணி வரை மாணவ, மாணவியருக்கான பல்வேறு போட்டிகள், 4 மணி முதல் 5 மணி வரை பள்ளி, கல்லூரி மாணவா்களின் கலைநிகழ்ச்சிகளும், 5மணி முதல் 6 மணி வரை பல்வேறு கலைநிகழ்ச்சிகளும் நடைபெறுகின்றன.

இதனையடுத்து மாலை 6 மணி முதல் 9 மணி வரை சிறந்த பேச்சாளா்களின் கருத்துரைகள், பல்வேறு நாட்டுப்புற கலைநிகழ்ச்சிகள் ஆகியனவும் நடைபெறவுள்ளது. தொடக்க விழாவில் எம்பி, எம்எல்ஏக்கள், அரசு அலுவலா்கள், உள்ளாட்சி மன்ற பிரதிநிதிகள் பங்கேற்கவுள்ளனா்.

ஆட்சியா் ஆய்வு:

புத்தக விழா ஏற்பாடுகள் குறித்து ஆட்சியா் கலைச்செல்வி மோகனின் ஆய்வின் போது மாவட்ட வருவாய் அலுவலா் செ.வெங்கடேஷ், ஆட்சியா்(பயிற்சி)ந.மிருணாளினி, பொதுப்பணித் துறை செயற்பொறியாளா் சிவசண்முகம், சாா் ஆட்சியா் ஆஷிக் அலி, உணவுப் பாதுகாப்புத்துறை மாவட்ட நியமன அலுவலா் அ.அனுராதா ஆகியோரும் உடன் இருந்தனா்.