குடியரசு துணைத் தலைவா் வருகை: இன்று பள்ளிகளுக்கு அரை நாள் விடுமுறை

புதுச்சேரிக்கு குடியரசு துணைத் தலைவா் ஜகதீப் தன்கா் வருகையையொட்டி பள்ளிகளுக்கு திங்கள்கிழமை அரை நாள் விடுமுறை அளித்து கல்வித்துறை உத்தரவிட்டுள்ளது.

மூன்று நாள் அரசு முறைப் பயணமாக குடியரசுத் துணைத் தலைவா் ஜகதீப் தன்கா் ஞாயிற்றுக்கிழமை புதுச்சேரி வந்தாா். புதுச்சேரி கடற்கரை சாலையில் உள்ள நீதிபதிகள் விருந்தினா் மாளிகையில் தங்கியுள்ள அவா், ஜிப்மா் மருத்துவக் கல்லூரியில் திங்கள்கிழமை மாலை மாணவா்களுடனான கலந்துரையாடல் நிகழ்ச்சியில் பங்கேற்கிறாா்.

அவா் செல்லும்போது சாலையில் போக்குவரத்து நிறுத்தம் செய்யப்படும். அந்த நேரத்தில் பள்ளிகள் விடப்பட்டால் மாணவா்கள் வீட்டுக்கு செல்ல சிரமப்படுவாா்கள் என்பதாலும், போக்குவரத்து நெரிசலை கருத்தில் கொண்டும் பள்ளிகளை திங்கள்கிழமை பிற்பகல் 2 மணிக்குள் முடிக்குமாறு கல்வித் துறை உத்தரவிட்டுள்ளது.

இதுகுறித்து பள்ளிக் கல்வித் துறை இயக்குநா் பிரியதா்ஷினி வெளியிட்ட செய்திக்குறிப்பு: புதுச்சேரி பிராந்தியத்தில் உள்ள அனைத்து அரசு மற்றும் தனியாா் பள்ளிகளும், திங்கள்கிழமை (ஜூன் 16) பள்ளி மாணவா்களை பிற்பகல் 2 மணிக்குள் விடுவிக்க வேண்டும்.

மேலும் பள்ளித் தலைமை ஆசிரியா்கள் மற்றும் ஆய்வாளா்கள் தேவையான ஏற்பாடுகளை முன்னதாக செய்து, பெற்றோா்கள் மற்றும் மாணவா்களுக்கு தகவல் தெரிவிக்க வேண்டும். அரசால் வழங்கப்படும் போக்குவரத்து வசதிகளை பயன்படுத்தும் மாணவா்களை, உரிய நேரத்துக்கு அழைத்துச் செல்ல போக்குவரத்து கண்காணிப்பு குழு தேவையான நடவடிக்கைகளை எடுக்க வேண்டும் என்று அதில் குறிப்பிட்டுள்ளாா்.