குமரியில் டிச. 30, 31இல் திருவள்ளுவா் சிலை வெள்ளி விழா: முன்னேற்பாடுகள் தீவிரம்!

கன்னியாகுமரியில் இம்மாதம் 30, 31ஆம் தேதிகளில் நடைபெறவுள்ள திருவள்ளுவா் சிலை வெள்ளி விழாவையொட்டி, முன்னேற்பாடுகள் தீவிரமாக நடைபெற்று வருகின்றன.

கன்னியாகுமரி கடலில் உள்ள இரு பாறைகளில் விவேகானந்தா் நினைவு மண்டபம், 133 அடி உயர திருவள்ளுவா் சிலை ஆகியவை அமைக்கப்பட்டுள்ளன. திருவள்ளுவா் சிலையை 1.1.2000இல் அப்போதைய முதல்வா் மு.கருணாநிதி திறந்துவைத்தாா். சிலை நிறுவப்பட்டு 25 ஆண்டுகளான நிலையில், தமிழக அரசு சாா்பில் வெள்ளி விழா நிகழ்ச்சிகள் இம்மாதம் 30, 31ஆம் தேதிகளில் நடைபெறவுள்ளன.

இதில், முதல்வா் மு.க. ஸ்டாலின், துணை முதல்வா் உதயநிதி ஸ்டாலின், அமைச்சா்கள், எம்எல்ஏக்கள், தமிழறிஞா்கள் உள்ளிட்டோா் பங்கேற்கவுள்ளனா்.

இதையொட்டி, கன்னியாகுமரி அரசு விருந்தினா் மாளிகையில் ஆயிரக்கணக்கானோா் அமரும் வகையில் பிரம்மாண்டான பந்தல் அமைத்தல், வளாகத்தில் உள்ள தங்கும் விடுதிகளைப் புதுப்பித்தல் பணிகள் நடைபெறுகின்றன.

மேலும், கடற்கரைச் சாலை, காந்தி, காமராஜா் நினைவு மண்டபங்கள், சுனாமி நினைவுப் பூங்கா ஆகியவற்றைப் புதுப்பிக்கும் பணிகள் 95 சதவீதம் நிறைவடைந்துள்ளன. கன்னியாகுமரி காவல் நிலையம் அருகேயுள்ள ரவுண்டானாவை புதுப்பித்தல், கடற்கரைச் சாலையிலுள்ள அரசு சுவா்களில் பல்வேறு இயற்கைக் காட்சிகளை நினைவூட்டும் வண்ண ஓவியங்கள் வரைதல், காந்தி மண்டபம் முன்புள்ள முக்கோணப் பூங்காவை சீரமைத்தல் ஆகிய பணிகளும் நடைபெற்று வருகின்றன. பேருந்து நிறுத்தத்தில் உள்ள பெயா்ப் பலகைகளில் திருவள்ளுவா் உருவம் வரையப்பட்டுள்ளது.

இணைப்புப் பாலம்: கடலில் அமைந்துள்ள விவேகானந்தா் நினைவு மண்டபம், திருவள்ளுவா் சிலை ஆகியவற்றை சுற்றுலாப் பயணிகள் பாா்த்து ரசிப்பதற்காக பூம்புகாா் கப்பல் போக்குவரத்துக் கழகம் சாா்பில் படகுகள் இயக்கப்பட்டு வருகின்றன. கடல் சீற்றம், கடல் நீா்மட்டம் தாழ்வுநிலை ஆகிய காலகட்டங்களில் திருவள்ளுவா் சிலைக்கு படகுகள் இயக்கப்படாததால் சுற்றுலாப் பயணிகள் ஏமாற்றமடைகின்றனா்.

எனவே, இரு பாறைகளையும் இணைக்க வேண்டுமென பல்வேறு தரப்பினரும் அரசுக்கு கோரிக்கை விடுத்துவந்தனா். அதையேற்று, நெடுஞ்சாலைகள்-சிறுதுறைமுகங்கள் துறை சாா்பில், தமிழ்நாடு கடல்சாா் வாரிய வைப்பு நிதியாக ரூ. 37 கோடியில் 97 மீட்டா் நீளம், 4 மீட்டா் அகலமுள்ள கண்ணாடி கூண்டுப் பாலம் அமைக்கப்பட்டு வருகிறது.

கடந்த ஆண்டு மே 24ஆம் தேதி முன்னாள் அமைச்சா் மனோ தங்கராஜ் முன்னிலையில் அமைச்சா் எ.வ. வேலு பணிகளைத் தொடக்கிவைத்தாா். தற்போது, பணிகள் நிறைவடையும் நிலையில் உள்ளதால், இப்பாலத்தை முதல்வா் மு.க. ஸ்டாலின் இம்மாதம் 30ஆம் தேதி திறந்து வைக்கவுள்ளாா். 31ஆம் தேதியும் பல்வேறு நிகழ்ச்சிகள் நடைபெறவுள்ளன.

விழாவையொட்டி பிரம்மாண்ட பந்தல் அமைக்கும் பணியில் 50-க்கும் மேற்பட்ட ஊழியா்கள் ஈடுபட்டுள்ளனா். முதல்வா் வருகையால் கன்னியாகுமரி நகரம் 25 ஆண்டுகளுக்குப் பின்னா் புதுப்பொலிவு பெற்றுவருவது குறிப்பிடத்தக்கது.