தூத்துக்குடி: குழந்தைகளுக்கு தமிழில் பெயர் வையுங்கள் என தமிழக துணை முதல்வர் உதயநிதி ஸ்டாலின் மணமக்களுக்கு வேண்டுகோள் விடுத்தார்.
ராஜபாளையம் சட்டப்பேரவை உறுப்பினர் தங்கப்பாண்டியன் இல்ல திருமண விழா தூத்துக்குடி எட்டயபுரம் சாலையில் உள்ள தனியார் மண்டபத்தில் வியாழக்கிழமை நடைபெற்றது.
இந்நிகழ்ச்சியில் துணை முதல்வர் உதயநிதி ஸ்டாலின் பங்கேற்று திருமணத்தை நடத்தி வைத்து பேசியதாவது:
“சுயமரியாதை திருமணங்கள் திராவிட இயக்கங்கள் உருவானதால்தான் நடந்து வருகிறது. தமிழில் திருமணம், தமிழில் அர்ச்சனை என்பதெல்லாம் திராவிட இயக்கம் தோன்றியதால் தான் வந்தது.
கோயில் கருவறையில் கூட இன்றைக்கு தமிழ் ஓசை கேட்கிறது. பெண்களுக்கு சொத்தில் சம உரிமை பெற்றுத் தந்தது திராவிட இயக்கத் தலைவர்கள்தான். தற்போது வரை பெண்களுக்குதான் மிக அதிக அளவில் முக்கியத்துவம் கொடுத்து திட்டங்கள் செயல்படுத்தப்பட்டு வருகின்றன.
மகளிர் உரிமைத் தொகை திட்டம், புதுமைப்பெண் திட்டம், பெண்களின் சுமையை போக்க குழந்தைகளுக்கு காலை உணவு திட்டம் என்று எண்ணற்ற திட்டங்கள் தற்போது செயல்படுத்தப்பட்டு வருகிறது. மகளிர் உரிமைத்தொகை மாதம் ஆயிரம் ரூபாய் தகுதி உள்ள அனைவருக்கும் கிடைக்கும் அளவிற்கு நடவடிக்கை எடுக்கப்பட்டு வருகிறது.
தம்பதியர்களுக்கு ஒரு வேண்டுகோளாக நான் வைக்க விரும்புவது அழகான தமிழில் பெயர் வைக்க வேண்டும் என்பதுதான். அனைவரும் இதனை செயல்படுத்தினால் மகிழ்ச்சியாக இருக்கும்” என்றார்.
