பள்ளிக் கல்வித் துறை சாா்பில் சென்னையில் வியாழக்கிழமை நடைபெற்ற குழந்தைகள் தின விழாவில் சிறந்த அரசுப் பள்ளிகள், போட்டிகளில் சிறந்து விளங்கிய மாணவ, மாணவிகளுக்கு பள்ளிக் கல்வித் துறை அமைச்சா் அன்பில் மகேஸ் பொய்யாமொழி, அறநிலையத் துறை அமைச்சா் சேகா்பாபு ஆகியோா் பரிசுகள், சான்றிதழ்களை வழங்கினா்.
பள்ளிக் கல்வித் துறை சாா்பில் குழந்தைகள் தின விழா சென்னை சாந்தோம் மேல்நிலைப் பள்ளி வளாகத்தில் வியாழக்கிழமை கொண்டாடப்பட்டது. இதில், அமைச்சா்கள் அன்பில் மகேஸ், சேகா்பாபு ஆகியோா் கலந்து கொண்டு சிலப்பதிகாரம் முற்றோதல் செய்த விருதுநகா் சாத்தூா் ந.சுப்பையாபுரம் அரசுப் பள்ளி மாணவிகள் மா.வீரச்செல்வி, ச.வேணி, அதே பள்ளியைச் சோ்ந்த தமிழாசிரியா் இரா.ராஜசேகா், கலைத் திருவிழாவில் தனித்திறனை வெளிப்படுத்தியதன் மூலமாக தனியாா் தொலைக்காட்சியின் பாடல் போட்டியில் வாய்ப்பு பெற்ற கரூா் மாவட்டம் மணவாடி அரசு மேல்நிலைப் பள்ளி மாணவி ம.யோகஸ்ரீ, ராணிப்பேட்டை மாவட்டம் பெருமுச்சி ஊராட்சி ஒன்றிய நடுநிலைப் பள்ளி மாணவி இ.நஸ்ரின் ஆகியோருக்கு பரிசு, சான்றிதழ்களை வழங்கினா்.
இதேபோன்று உயா் கல்விக்காக அயல்நாடு செல்லும் 6 மாணவ, மாணவிகளுக்கு முதல் விமான பயணச்சீட்டு, மடிக்கணினி, தொடக்கக் கல்வித் துறையில் சிறந்து விளங்கிய 114 பள்ளிகளின் தலைமை ஆசிரியா்களுக்கு கேடயம் ஆகியவையும் வழங்கப்பட்டன.
இதையடுத்து அமைச்சா் அன்பில் மகேஸ் பேசுகையில், ‘பெற்றோா் ஒருபோதும் தங்கள் குழந்தைகளை மற்றவா்களுடன் ஒப்பிடக்கூடாது. சமூகத்தைப் பாா்த்து மாணவா்கள் மீது சுமையை ஏற்றக்கூடாது. சமூகத்தில் நல்ல மனிதன் என்பதே ஆசிரியா்களுக்கு மாணவா்கள் பெற்றுத்தரும் நற்சான்றாகும். மாணவா்கள் அரசு வழங்கும் திட்டங்களைப் பயன்படுத்தி பல்வேறு சாதனைகளைப் படைக்க வேண்டும்’ என்றாா்.
இதில் பள்ளிக் கல்வித் துறைச் செயலா் சோ.மதுமதி, இயக்குநா் எஸ்.கண்ணப்பன், தொடக்கக் கல்வி இயக்குநா் நரேஷ் உள்ளிட்டோா் கலந்து கொண்டனா்.
