கூட்டணியை விட மக்களின் ஆதரவே தோ்தல் வெற்றிக்கு முக்கியம் முன்னாள் அமைச்சா் செல்லூா் கே. ராஜூ

தோ்தல் வெற்றிக்குக் கூட்டணியை விட மக்கள் ஆதரவே முக்கியம் என அதிமுக முன்னாள் அமைச்சா் செல்லூா் கே. ராஜூ தெரிவித்தாா்.

மதுரையில் வெள்ளிக்கிழமை செய்தியாளா்களிடம் அவா் தெரிவித்ததாவது :

அதிமுக பொதுச் செயலாளா் தமிழகம் முழுவதும் சென்று மக்களைச் சந்தித்து வருகிறாா். அவருக்கு, எம்.ஜி.ஆா்., ஜெயலலிதாவுக்கு கிடைத்தது போன்ற மகத்தான வரவேற்பு மக்களிடம் கிடைத்து வருகிறது. தமிழக சட்டப்பேரவைத் தோ்தலுக்கு ஏறத்தாழ இன்னும் 8 மாதங்கள் உள்ளன. எனவே, கூட்டணி குறித்து இப்போது முழுமையாக முடிவு செய்ய முடியாது.

தமிழகத்தில் முரண்பாடு கொண்ட கட்சிகள் கூட கூட்டணியாக இருந்துள்ளன. 1967-இல் எதிரெதிா் கொள்கைகள் கொண்ட பல கட்சிகளை ஒருங்கிணைத்து அண்ணா கூட்டணி அமைத்தாா். தோ்தலைப் பொருத்தவரை கூட்டணியை விட மக்களின் ஆதரவே முக்கியம். தற்போதைய நிலையில், மக்களின் உணா்வை, ஆதரவை வாக்குகளாக மாற்றும் முயற்சிகளில் அதிமுக தீவிரமாக உள்ளது. இதற்காக, 68 ஆயிரம் கிளை அமைப்புகள் ஏற்படுத்தப்பட்டுள்ளன.

முன்னாள் முதல்வா் ஒ. பன்னீா்செல்வம், முதல்வா் மு.க. ஸ்டாலினை சந்தித்து அவரது தனிப்பட்ட விருப்பம். அவருக்கு ஏற்பட்ட மனமாற்றம் குறித்து அவா் மட்டுமே விளக்கம் அளிக்க முடியும் என்றாா் செல்லூா் கே. ராஜூ.