கூட்டுறவுத் துறை சாா்பில் ஜூலை 6-ல் சென்னையில் மினி மராத்தான்

கூட்டுறவுத் துறை சாா்பில் ஜூலை 6 ஆம் தேதி சென்னை தீவுத்திடலில் மினி மராத்தான் நடைபெறுகிறது.

இதுகுறித்து சேலம் மாவட்ட கூட்டுறவுத் துறை சாா்பில் வெளியிடப்பட்ட செய்திக் குறிப்பு:

சா்வதேச கூட்டுறவு நாள் கொண்டாட்டத்தை முன்னிட்டு தமிழக கூட்டுறவுத் துறை சாா்பாக மினி மாரத்தான் போட்டி ‘ஒருவருக்காக எல்லோரும் ஓடுவோம் எல்லோரும் ஓடி கூட்டு உறவாகுவோம்’ என்ற தலைப்பில் ‘சமத்துவம் கூட்டுறவின் மகத்துவம் - கூடுவோம், ஓடுவோம், கூட்டுறவால் உலகை வெல்வோம்’ என்ற கருப்பொருளைக் கொண்டு சென்னை தீவுத்திடலில் ஜூலை 6-ஆம் தேதி காலை 5.30 மணிக்கு நடைபெறுகிறது.

கூட்டுறவுத் துறை அமைச்சா் கே.ஆா்.பெரியகருப்பன் இப் போட்டியில் பங்கேற்கிறாா். மினி மாரத்தான் போட்டியானது சென்னை தீவுத்திடலில் தொடங்கி சுவாமி சிவானந்தா சாலை வழியாக மன்றோ சிலை சென்று மீண்டும் சென்னை தீவுத்திடலில் முடிவடைகிறது.

போட்டியில் பங்கேற்கும் ஆண், பெண்களுக்கான வயது வரம்பு 18 முதல் 40 வரையும், 40 மற்றும் அதற்கு மேல் என இருபிரிவுகளில் நடைபெறும். போட்டியில் வெற்றி பெறுபவா்களுக்கு முதல் பரிசாக ரூ.30,000, இரண்டாம் பரிசு ரூ.20,000, மூன்றாம் பரிசு ரூ.10,000 வழங்கப்படும்.

ஆண்கள் மற்றும் பெண்களுக்கு தனித்தனியே பரிசுகள் வழங்கப்படும். ஒற்றுமைத் திருவிழாவில் பங்கேற்க நுழைவுக் கட்டணமாக ரூ.100 செலுத்த வேண்டும். மேலும் விவரங்களுக்கு 97909 54671 என்ற எண்ணில் தொடா்புகொள்ளலாம் என அதில் தெரிவிக்கப்பட்டுள்ளது.