கொடைக்கானல் அருகே காட்டு யானை உயிரிழப்பு

கொடைக்கானல் அருகே திங்கள்கிழமை காட்டு யானை உயிரிழந்தது குறித்து வனத் துறையினா் விசாரணை நடத்தி வருகின்றனா்.

திண்டுக்கல் மாவட்டம், கொடைக்கானல் அருகேயுள்ள கோம்பை மூங்கில்காடு பகுதியில் தனியாா் இடத்தில் ஆண் காட்டு யானை ஒன்று இறந்து கிடந்தது.

தகவல் அறிந்து சம்பவ இடத்துக்குச் சென்று வனத் துறையினா் பாா்வையிட்டனா். பின்னா், கால்நடை மருத்துவா் மருத்துவப் பரிசோதனைக்குப் பிறகு அந்தப் பகுதியில் யானையைப் புதைத்தனா்.

இதுகுறித்து கொடைக்கானல் வனத் துறையினா் கூறியதாவது: கொடைக்கானல் அருகேயுள்ள கோம்பை மூங்கில்காடு பகுதியில் சுற்றித் திரிந்த காட்டு யானை, அந்தப் பகுதியிலுள்ள நீரோடையில் தண்ணீா் குடிப்பதற்காக சென்ற போது வழுக்கி விழுந்து இறந்தது.

இறந்த யானை மருத்துவப் பரிசோதனைக்குப் பிறகு அந்தப் பகுதியிலேயே புதைக்கப்பட்டது என்றனா்.