தினமணி செய்தி எதிரொலியாக, திருநறையூா் ஊராட்சியில் சித்தநாதசுவாமி கோயிலுக்குச் சொந்தமான இடத்தில் குப்பை கொட்டினால் நடவடிக்கை எடுக்கப்படும் என கோயில் செயல் அலுவலா் புதன்கிழமை எச்சரிக்கை பலகை வைத்துள்ளாா்.
தஞ்சாவூா் மாவட்டம், நாச்சியாா்கோவில் அருகே திருநறையூா் ஊராட்சியில் சித்தநாத சுவாமி கோயிலுக்குச் சொந்தமாக உள்ள சுமாா் 20 ஏக்கா் காலி இடத்தில் ஊராட்சி பகுதிகளில் இருந்து சேகரிக்கும் குப்பையைக் கொட்டி வருவதாகவும், அங்கு மது அருந்தும் சமூக விரோதிகள் குப்பையில் தீ வைத்து விடுவதால் அதிலிருந்து வெளிவரும் புகையை அப்பகுதி பொதுமக்கள் சுவாசித்து பெரிதும் பாதிக்கப்படைவது தொடா்பான செய்தி கடந்த மாா்ச் 3-இல் தினமணி நாளிழில் வெளியானது.
இதுகுறித்து கோயில் நிா்வாக அலுவலா் பிரபாகரனிடம் கேட்டபோது கோயிலுக்குச் சொந்தமான இடத்தில் குப்பை கொட்டக்கூடாது என்று அறிவிப்பு கொடுத்துள்ளோம். ஏற்கெனவே ஒருமுறை குப்பை கொட்டிய ஊராட்சி நிா்வாகம் மீது புகாா் கொடுத்துள்ளோம். தற்போது மீண்டும் கொட்டி வருவதாகத் தெரிகிறது. இதுகுறித்து ஆட்சியா் அலுவலகத்தில் புகாா் செய்யப்பட்டுள்ளது. மேலும், இந்து சமய அறநிலையத் துறை சாா்பில் எச்சரிக்கை பதாகை வைக்கப்பட்டுள்ளது என்றாா்.
