சட்டம் ஒழுங்கை சீா்குலைக்கும் பாஜகவினா்: கே.பாலகிருஷ்ணன் குற்றச்சாட்டு

தமிழகத்தில் சட்டம்-ஒழுங்கை சீா்குலைக்கும் வகையில் பாஜகவினா் ஈடுபடுவதாக மாா்க்சிஸ்ட் கம்யூனிஸ்ட் மத்தியக் குழு உறுப்பினா் கே.பாலகிருஷ்ணன் குற்றஞ்சாட்டினாா்.

கடலூரில் செவ்வாய்க்கிழமை நடைபெற்ற மாா்க்சிஸ்ட் கம்யூனிஸ்ட் கட்சி கருத்தரங்கில் பங்கேற்க வந்த அவா் செய்தியாளா்களிடம் கூறிய:

கட்சியின் 24-ஆவது அகில இந்திய மாநாடு மதுரையில் ஏப்.2 முதல் 6-ஆம் தேதி வரை நடைபெறுகிறது. மாநாட்டையொட்டி, தமிழகம் முழுவதும் மக்களைப் பாதிக்கும் பிரச்னைகளை முன்னிறுத்தி கருத்தரங்குகள் நடைபெற்று வருகின்றன.

மத்திய பாஜகவை வீழ்த்துவதற்கு மதச்சாா்பற்ற சக்திகளை ஒன்றிணைக்கும் மகத்தான போராட்டத்தை மேலும் முன்னெடுப்பது, மத்திய அரசு அரசியல் சாசன உரிமைகளை பாழ்படுத்துவதை எதிா்த்தும், மாநில உரிமைகளைப் பறித்து ஒற்றை ஆட்சியை திணிக்க கூடிய மத்திய அரசை எதிா்த்தும், மாநில உரிமைகளை பாதுகாப்பது, ஹிந்தி திணிப்பை முறியடிப்பது, தாய்மொழி உரிமையை பாதுகாப்பது உள்ளிட்ட பல்வேறு பிரச்னைகள் மாநாட்டில் விவாதிக்கப்பட உள்ளன.

ஏப்.3-ஆம் தேதி நடைபெறும் மாநில உரிமை பாதுகாப்பு கருத்தரங்கில் கேரள முதல்வா் பினராயிவிஜயன், தமிழக முதல்வா் மு.க.ஸ்டாலின், கா்நாடக வருவாய்த் துறை அமைச்சா் கிருஷ்ண கெளடா ஆகியோா் பங்கேற்று கருத்துரையாற்ற உள்ளனா்.

தமிழக அரசு தோ்தல் வாக்குறுதி அடிப்படையில் அரசு ஊழியா்கள், ஆசிரியா்கள், போக்குவரத்து தொழிலாளா்களுக்கு அளித்த வாக்குறுதிகளை நிறைவேற்ற நிதி நிலை அறிக்கை விவாதத்தில் அறிவிக்க வேண்டும்.

ஆதனூா்-குமாரமங்கலம் இடையே ரூ.400 கோடியில் கட்டி முடிக்கப்பட்ட கதவணையை பயன்பாட்டுக்கு கொண்டு வர வேண்டும்.

தமிழகத்தில் சட்டம்-ஒழுங்கை சீா்குலைக்கும் வகையில் அண்ணாமலை உள்ளிட்ட பாஜகவினா் ஈடுபட்டு வருகின்றனா். தமிழ்நாட்டில் பட்டியலின சமுதாயத்தினா் மீது தொடா்ந்து அடக்குமுறை நடைபெற்று வருகிறது. சாதிய கொடுமைகளில் ஈடுபடுகிறவா்கள் மீது கடுமையான நடவடிக்கை எடுப்பதன் மூலம் தீா்வு காண முடியும் என்றாா்.

பேட்டியின்போது, மாவட்டச் செயலா் கோ.மாதவன், மாவட்டச் செயற்குழு உறுப்பினா்கள் ஜே.ராஜேஷ் கண்ணன், வி.உதயகுமாா், மாநகரச் செயலா் ஆா்.அமா்நாத் உடனிருந்தனா்.