வன்னியா் சங்கத்தின் சாா்பில் தாராசுரத்தில் ஞாயிற்றுக்கிழமை (பிப். 23) நடைபெறவுள்ள சோழ மண்டல சமய, சமுதாய நல்லிணக்க மாநாட்டுக்கு வருமாறு தொண்டா்களுக்கு பாமக நிறுவனா் ராமதாஸ் அழைப்பு விடுத்துள்ளாா்.
இது தொடா்பாக அவா் வெள்ளிக்கிழமை வெளியிட்ட அறிக்கை:
வன்னியா் சங்கத்தின் சாா்பில் அறிவிக்கப்பட்டுள்ள சோழ மண்டல சமய, சமுதாய நல்லிணக்க மாநாடு தஞ்சாவூா் மாவட்டம் கும்பகோணத்தையடுத்த தாராசுரம் புறவழிச் சாலையில் ஞாயிற்றுக்கிழமை பிற்பகல் 3 மணிக்கு நடைபெறவுள்ளது. தமிழகத்தின் மிக முக்கியமான தேவைகள் அனைத்துச் சமூகங்களுக்கும் சமூகநீதி வழங்கப்பட வேண்டும். அதன் பயனாக அனைத்துச் சமூகங்கள் மத்தியிலும் சமத்துவம் ஏற்படுத்தப்பட வேண்டும். அனைத்துச் சமூகங்கள் மத்தியிலும் நல்லிணக்கத்தை ஏற்படுத்த வேண்டும் என்பதுதான்.
இவை அனைத்தையும் உறுதிசெய்ய வேண்டியது ஆட்சியாளா்கள்தான். ஆனால், அவா்களின் கவனம் முழுவதும் வேறு இலக்குகளை நோக்கி உள்ள நிலையில், சமூக நீதி, ஜாதிவாரி மக்கள்தொகை கணக்கெடுப்பு, சமய, சமுதாய நல்லிணக்கம் ஆகியவற்றை நோக்கி அரசின் கவனத்தைத் திருப்புவதற்கான முயற்சிதான் இந்த மாநாடு.
பாட்டாளி சொந்தங்கள் அனைவரும் மாநாட்டுக்கு வர வேண்டும். தேவையற்ற முழக்கங்களை எழுப்பக்கூடாது. நம்மைச் சீண்டும் செயல்களில் எவரேனும் ஈடுபட்டாலும் அவா்களுக்கு எதிா்வினையாற்றாமல் கடந்து செல்ல வேண்டும் எனத் தெரிவித்துள்ளாா் ராமதாஸ்.
