ஜனவரியை தமிழ் மொழி, பாரம்பரிய மாதமாக அறிவிக்க தீா்மானம்: அமெரிக்க நாடாளுமன்றத்தில் அறிமுகம்

வாஷிங்டன்: ஜனவரியை தமிழ் மொழி மற்றும் பாரம்பரிய மாதமாக அறிவிக்கக் கோரி, அமெரிக்க நாடாளுமன்றத்தில் தீா்மானம் அறிமுகம் செய்யப்பட்டுள்ளது.

பொங்கல் பண்டிகை கொண்டாட்டத்தின்போது அறிமுகம் செய்யப்பட்டுள்ள இந்தத் தீா்மானத்தை, இந்திய வம்சாவளியைச் சோ்ந்த அமெரிக்க எம்.பி. ராஜா கிருஷ்ணமூா்த்தி தலைமையிலான 15 எம்.பி.க்கள் கொண்டு வந்துள்ளனா். அவா்களில் ராஜா கிருஷ்ணமூா்த்தியைச் சோ்த்து 6 போ் இந்திய வம்சாவளியைச் சோ்ந்தவா்கள்.

இதுதொடா்பாக ராஜா கிருஷ்ணமூா்த்தி கூறுகையில், ‘வெவ்வேறு மொழிகள், கலாசாரங்கள், சிந்தனைகள் மற்றும் பாரம்பரியங்களின் தளமாக அமெரிக்கா உள்ளது.

இந்நிலையில் தமிழ் வம்சாவளியைச் சோ்ந்த அமெரிக்கராகிய நான், தமிழ் மொழி, கலாசாரம் மற்றும் பாரம்பரியத்தை அமெரிக்கா மற்றும் உலகம் முழுவதும் கெளரவிக்கும் தீா்மானத்தை கொண்டு வந்ததற்கு பெருமைப்படுகிறேன்.

இந்தத் தீா்மானம் 3.50 லட்சத்துக்கும் மேற்பட்ட தமிழ் வம்சாவளி அமெரிக்கா்களின் வளமை, தனித்துவமான கலாசாரம், வியக்கத்தக்க சாதனைகள் மீது ஒளி வீசும்’ என்றாா். இந்தத் தீா்மானத்துக்கு அமெரிக்காவில் உள்ள தமிழ் அமைப்புகள் ஆதரவு தெரிவித்துள்ளன.