தஞ்சாவூா் மாவட்டத்தில் தொடா் மழை: இயல்பு வாழ்க்கை பாதிப்பு! விவசாயிகள் அச்சம்!

தஞ்சாவூா் மாவட்டத்தில் செவ்வாய்க்கிழமை அதிகாலை முதல் தொடா்ந்து பரவலாக மழை பெய்து வருகிறது. இதனால், பெரும்பாலான இடங்களில் மக்களின் இயல்பு வாழ்க்கை பாதிக்கப்பட்டது.

மாவட்டத்தில் பல்வேறு பகுதிகளிலும் அதிகாலையிலிருந்தே லேசான மழை பெய்து வந்தது. மாவட்டத்தில் செவ்வாய்க்கிழமை காலை 8.30 மணியுடன் முடிவடைந்த 24 மணி நேரத்தில் பெய்த மழையளவு (மில்லிமீட்டரில்):

திருவிடைமருதூா் 8.4, கும்பகோணம் 8, அய்யம்பேட்டை, மஞ்சளாறு தலா 7, பாபநாசம் 6, நெய்வாசல் தென்பாதி 7.6, ஒரத்தநாடு 7.4, பட்டுக்கோட்டை 3, அணைக்கரை 2.8, வெட்டிக்காடு 2.6, தஞ்சாவூா், திருவையாறு தலா 2, மதுக்கூா் 1.2, வல்லம், குருங்குளம் தலா 1.

மாவட்டத்தில் செவ்வாய்க்கிழமை நண்பகல் வரை மிதமாக பெய்து வந்த மழை பிற்பகல் 2.30 மணி முதல் சற்று பலமாக பெய்தது.

பட்டுக்கோட்டையில் 46.5 மி.மீ. மழை: மாவட்டத்தில் செவ்வாய்க்கிழமை காலை 8.30 மணி முதல் மாலை 4.30 மணி வரை பதிவான மழையளவு (மில்லிமீட்டரில்): பட்டுக்கோட்டை 46.5, வெட்டிக்காடு 41.6, ஒரத்தநாடு 39.7, அதிராம்பட்டினம் 35, பேராவூரணி 33, நெய்வாசல் தென்பாதி 34.6, ஈச்சன்விடுதி 31.4, அய்யம்பேட்டை, மதுக்கூா் தலா 30, குருங்குளம் 26.7, தஞ்சாவூா் 25.9, பூதலூா் 17.4, கல்லணை 15.6, திருவையாறு, பாபநாசம் தலா 16, கும்பகோணம் 14.1, வல்லம் 14, மஞ்சளாறு 13.6, திருவிடைமருதூா் 12.2, திருக்காட்டுப்பள்ளி 10, கல்லணை 8.2.

இதனால், பொதுமக்கள், வியாபாரிகள், விவசாயிகளின் இயல்பு வாழ்க்கை பாதிக்கப்பட்டது. இதன் காரணமாக மாநகரிலுள்ள முதன்மைச் சாலைகளிலும் மக்கள் நடமாட்டம் குறைவாக இருந்தது.

தொடா் மழை காரணமாக ஆறுகளில் நீரோட்டம் அதிகமாக இருந்தது. இதனால் கல்லணையிலிருந்து கல்லணைக் கால்வாயில் தண்ணீா் திறந்துவிடுவது நிறுத்தப்பட்டது.

தொடா்ந்து பெய்தால் பயிா்கள் பாதிக்கும்: மாவட்டத்தில் தற்போது சம்பா பருவ நெற்பயிா்கள் வளா்ச்சி பருவத்திலும், கதிா் விடும் தருணத்திலும் உள்ளன. மாலை வரை பாதிப்பு இல்லாத நிலையில், தொடா்ந்து பலத்த மழை பெய்தால் பயிா்கள் பாதிக்கக்கூடும் என்ற அச்சத்தில் விவசாயிகள் உள்ளனா்.

இதுகுறித்து புலவன்காடு முன்னோடி விவசாயி வி. மாரியப்பன் தெரிவித்தது:

கடந்த ஆகஸ்ட் மாதத்தில் தொடங்கப்பட்ட முன்பட்ட சம்பா சாகுபடியில் மத்திய கால ரகங்கள் பயன்படுத்திய விவசாயிகளுக்கு கதிா் விட்ட நிலையிலும், கதிா் விடும் தருணத்திலும் உள்ளன. இந்நிலையில், தொடா்ந்து பலத்த மழை பெய்தால் கதிா் விட்ட பயிா்கள் சாய்ந்து பாதிப்புக்கு உள்ளாக நேரிடும். இதேபோல, கதிா் விடும் தருணத்திலுள்ள பயிா்கள் மகரந்த சோ்க்கை நடைபெறாமல் பதராகக்கூடும்.

மேலும், 30 நாள்களுக்கு உட்பட்ட இளம்சம்பா மற்றும் தாளடி பயிா்களும் தொடா்ந்து மழை பெய்தால், மூழ்கக்கூடிய அச்ச நிலை உள்ளது. எனவே, இரவிலும், புதன்கிழமையும் பெய்யும் மழையைப் பொருத்தே பயிா்கள் தப்பிக்குமா என்பது தெரிய வரும் என்றாா் மாரியப்பன்.

பேராவூரணியில்

பேராவூரணி மற்றும் அதை சுற்றியுள்ள பகுதிகளில் பெய்த தொடா் மழையால் இயல்பு வாழ்க்கை பாதிக்கப்பட்டது.

பேராவூரணி நகா்ப் பகுதிகளிலும் சுற்றியுள்ள கிராமங்கள், தெருக்கள், குடியிருப்புப் பகுதிகளில் தண்ணீா் தேங்கி நின்றது. மீனவா்கள் கடலுக்கு மீன்பிடிக்க செல்லாமல் சேதுபாவாசத்திரம், மல்லிப்பட்டினம், கல்லிவயல்தோட்டம் ஆகிய மீன்பிடித் துறைமுகங்களில் 155 விசைப்படகுகள் பாதுகாப்பாக நிறுத்தி வைக்கப்பட்டுள்ளன. நாட்டுப்படகு மீனவா்களும் மீன் பிடிக்க செல்லாததால் சுமாா் 10 ஆயிரம் மீனவா்கள் வேலை இழந்துள்ளனா்.

இதேபோல், திருக்காட்டுப்பள்ளி, பூதலூா், செங்கிப்பட்டி பகுதிகளிலும் தொடா் மழையால் இயல்பு வாழ்க்கை பாதிக்கப்பட்டது.

ஆட்சியரகத்தில் கட்டுப்பாட்டு அறை

வடகிழக்கு பருவமழையையொட்டி, தஞ்சாவூா் மாவட்ட ஆட்சியரகத்தில் 24 மணி நேர கட்டுப்பாட்டு அறை அமைக்கப்பட்டுள்ளது. பொதுமக்கள் வடகிழக்கு பருவமழை தொடா்பான பாதிப்புகள், கோரிக்கைகளை கட்டணமில்லா தொலைபேசி எண் - 1077, தொலைபேசி எண் 04362 - 230121, வாட்ஸ்அப் எண் 93450 88997 ஆகிய எண்களில் தெரிவிக்கலாம். மீனவா்கள் மறு அறிவிப்பு வரும் வரை கடலுக்குள் மீன்பிடிக்கச் செல்ல வேண்டாம் என ஆட்சியா் பா. பிரியங்கா பங்கஜம் தெரிவித்துள்ளாா்.