தனியாா் சுயநிதி மருத்துவக் கல்லூரிகளுக்கான கட்டண நிா்ணயம்: அரசு பதிலளிக்க உத்தரவு

தனியாா் சுயநிதி மருத்துவக் கல்லூரிகளுக்கு கட்டணம் நிா்ணயித்து பிறப்பித்த உத்தரவை எதிா்த்து தாக்கல் செய்யப்பட்ட மனுவுக்கு தமிழக அரசும், கட்டண நிா்ணயக் குழுவும் பதிலளிக்க வேண்டுமென சென்னை உயா்நீதிமன்றம் உத்தரவிட்டது.

உச்சநீதிமன்ற உத்தரவின்படி, தனியாா் சுயநிதி மருத்துவக் கல்லூரிகள் உள்ளிட்ட தனியாா் தொழிற்கல்வி கல்லூரிகளுக்கு கட்டணம் நிா்ணயிப்பதற்காக கட்டணம் நிா்ணயக் குழுவை நியமித்து தமிழக அரசு உத்தரவு பிறப்பித்தது. தமிழகத்தில் உள்ள தனியாா் சுயநிதி மருத்துவக் கல்லூரிகளுக்கு 2022-2023, 2023-2024, 2024-2025-ஆம் ஆண்டுகளுக்கான கட்டணத்தை நிா்ணயித்து, நீதிபதி கே.வெங்கட்ராமன் தலைமையிலான கட்டண நிா்ணயக் குழு 2022-ஆம் ஆண்டு அக்டோபா் மாதம் உத்தரவு பிறப்பித்தது.

கட்டண பாரபட்சம்: இந்த உத்தரவை ரத்து செய்யக் கோரி தமிழ்நாடு சுயநிதி மருத்துவக் கல்லூரிகள் சங்கம் சாா்பில் சென்னை உயா்நீதிமன்றத்தில் மனு தாக்கல் செய்யப்பட்டுள்ளது. அந்த மனுவில், ‘தனியாா் சுயநிதி மருத்துவக் கல்லூரிகளுக்கு அரசு ஒதுக்கீட்டு இடங்களுக்கு கட்டணமாக ரூ. 4 லட்சத்து 35 ஆயிரம், நிா்வாக ஒதுக்கீட்டு இடங்களுக்கு ரூ. 13 லட்சத்து 50 ஆயிரம் என கட்டண நிா்ணயக் குழு நிா்ணயித்துள்ளது.

ஆனால், தனியாா் பல்கலைக்கழக மருத்துவக் கல்லூரிகளில் அரசு ஒதுக்கீட்டு இடங்களுக்கு ரூ. 5 லட்சத்து 40 ஆயிரம், நிா்வாக ஒதுக்கீட்டு இடங்களுக்கு ரூ. 16 லட்சத்து 20 ஆயிரம் என கட்டண நிா்ணயக் குழு நிா்ணயித்துள்ளது பாரபட்சமானது.

தனியாா் சுயநிதி மருத்துவக் கல்லூரிகளில் உள்ள வசதிகள்தான், தனியாா் பல்கலைக்கழக மருத்துவக் கல்லூரிகளிலும் உள்ளன. மேலும், ஆசிரியா்களுக்கான ஊதியம் உள்பட தனியாா் சுயநிதி கல்லூரிகளுக்கான செலவுகள் ஆண்டுதோறும் அதிகரித்து வரும் நிலையில், தனியாா் பல்கலைக்கழக மருத்துவக் கல்லூரிகளுக்கு அவ்வளவு செலவுகள் இல்லை.

இது குறித்து, தனியாா் சுயநிதி மருத்துவக் கல்லூரிகளுக்கான கட்டணத்தை விட, தனியாா் பல்கலைக்கழக மருத்துவக் கல்லூரிகளுக்கு அதிக கட்டணம் நிா்ணயித்துள்ளது குறித்து கட்டண நிா்ணயக் குழுவுக்கு மனு அளித்த போதும் அந்த மனு பரிசீலிக்கப்படவில்லை.

ஆகவே, தனியாா் பல்கலைக்கழக மருத்துவக் கல்லூரிகளுக்கு இணையாக தனியாா் சுயநிதி மருத்துவக் கல்லூரிகளுக்கும் கட்டணம் நிா்ணயிக்க வேண்டும் என அந்த மனுவில் தெரிவிக்கப்பட்டுள்ளது.

இந்த மனு நீதிபதிகள் கிருஷ்ணகுமாா் மற்றும் பாலாஜி அமா்வு முன் விசாரணைக்கு வந்தது. அப்போது, இந்த வழக்கில் சுயநிதி மருத்துவக் கல்லூரிகள் சங்கம் சாா்பாக மூத்த வழக்குரைஞா் ஐசக் மோகன்லால் ஆஜராகி வாதாடினாா். வாதங்களை கேட்டறிந்த நீதிபதிகள், இந்த மனு குறித்து இரு வாரங்களில் பதிலளிக்கும்படி தமிழக அரசுக்கும், கட்டண நிா்ணயக் குழுவுக்கும் உத்தரவிட்டனா்.