திருக்குவளை அரசுப் பள்ளி நூற்றாண்டு தொடக்க விழா

திருக்குவளை ஊராட்சி ஒன்றிய நடுநிலைப் பள்ளி நூற்றாண்டு தொடக்க விழா புதன்கிழமை நடைபெற்றது.

திருக்குவளையில் முன்னாள் முதல்வா் கருணாநிதி பிறந்த இல்லத்தில் அவரது உருவச் சிலைக்கு தமிழக பள்ளிக் கல்வித் துறை செயலா் எஸ். மதுமதி, நாகை மாவட்ட ஆட்சியா் ப. ஆகாஷ், தமிழக மீன்வளா்ச்சி கழகத் தலைவா் என். கௌதமன், தாட்கோ தலைவா் உ. மதிவாணன், சட்டப்பேரவை உறுப்பினா் வி.பி. நாகை மாலி ஆகியோா் மாலை அணிவித்து மரியாதை செலுத்தினா்.

தொடா்ந்து, ஊராட்சி ஒன்றிய நடுநிலைப்பள்ளியிலிருந்து நுாற்றாண்டு தீப ஒளி சுடரை கருணாநிதியுடன் படித்த அவரது நண்பா் சுப்பையா ஏற்றி வைத்து விழாவை தொடங்கிவைத்தாா். தமிழ்நாடு திட்டக்குழு செயல் துணைத் தலைவா் பேராசிரியா் ஜெ. ஜெயரஞ்சன் முன்னிலை

வகித்தாா். மாதிரிப் பள்ளிகளின் உறுப்பினா் செயலா் ஆா். சுதன் வரவேற்றாா்.

தொடா்ந்து, முதல்வா் மு.க. ஸ்டாலினின் பதிவு செய்யப்பட்ட காணொலி காட்சி வாயிலாக பள்ளியின் நூற்றாண்டு விழா குறித்து வாழ்த்தி பேசினாா். நிகழ்ச்சியில் பள்ளிக் கல்வித் துறை சாா்பில் என் பள்ளி, என் கடமை, என் பொறுப்பு என்ற விழுதுகள் செயலியை பள்ளிக் கல்வித்துறை செயலா் எஸ். மதுமதி தொடங்கிவைத்தாா். தமிழ்நாடு திட்டக் குழுவின் செயல் துணைத்தலைவா் பேராசிரியா் ஜெ.ஜெயரஞ்சன் வாசிக்க, அனைவரும் நூற்றாண்டு உறுதிமொழி ஏற்றனா்.

பேராசிரியா் பிரபாகல்விமணி, எழுத்தாளா் மற்றும் பேச்சாளா் நந்தலாலா, எழுத்தாளா் பவா செல்லதுரை, உதவிப் பேராசிரியா் உமாபாா்வதி, வானியல் இயற்பியல் விஞ்ஞானி கிரிஸ்பின் காா்த்திக், கவிஞா் சுகிா்தராணி, எழுத்தாளா் சல்மா ஆகியோா் நூற்றாண்டு விழா மற்றும் அரசுப் பள்ளி முன்னாள் மாணவா்களை வாழ்த்தி பேசினா்.

தொடா்ந்து ஊராட்சி ஒன்றிய நடுநிலைப் பள்ளி மூத்த முன்னாள் மாணவா், கலைஞா் அகரம் பயின்ற சுப்பையாவுக்கு பள்ளிக் கல்வித் துறை செயலா் நினைவுப் பரிசு வழங்கினாா். விழாவில் திருக்குவளை ஊராட்சி ஒன்றிய நடுநிலைப் பள்ளியில் பணியாற்றி ஓய்வுபெற்ற ஆசிரியா்கள் நினைவுப்பரிசுகள் வழங்கி கௌரவிக்கப்பட்டனா். மாவட்ட ஆட்சியா் ப. ஆகாஷ் நன்றி கூறினாா்.