தோ்தல் விதிமுறைகளில் திருத்தம்: மத்திய அரசு, தோ்தல் ஆணையம் பதிலளிக்க உச்சநீதிமன்றம் உத்தரவு

புது தில்லி: தோ்தல் நடத்தை விதிமுறைகளில் மேற்கொள்ளப்பட்ட திருத்தத்துக்கு எதிராக காங்கிரஸ் தாக்கல் செய்த மனுவுக்கு பதிலளிக்க மத்திய அரசு, தோ்தல் ஆணையத்துக்கு உச்சநீதிமன்றம் புதன்கிழமை உத்தரவிட்டது.

தோ்தல் நடத்தை விதிமுறைகள் 1961-இன் 93 (2) (ஏ)-ஆவது விதிமுறையின்படி, தோ்தல் தொடா்பான கண்காணிப்பு கேமரா காட்சிகள், இணையவழியில் ஒளிபரப்பப்படும் காட்சிகள் போன்றவற்றை பொதுமக்கள் பெற்று ஆய்வு மேற்கொள்ளலாம். இந்நிலையில், தோ்தல் ஆணைய பரிந்துரையின்படி, இந்த விதிமுறையில் மத்திய சட்ட அமைச்சகம் திருத்தம் செய்துள்ளது.

இதுகுறித்து தோ்தல் ஆணைய அதிகாரிகள் கூறுகையில், ‘வாக்குச்சாவடிகளில் பதிவாகும் கண்காணிப்பு கேமரா காட்சிகளை பெற்று, அவற்றைத் தவறாகப் பயன்படுத்த வாய்ப்புள்ளது. இது வாக்காளரின் அடையாளத்தை பொதுவெளியில் வெளியிடாமல் ரகசியம் காக்கும் தன்மையில் சமரசத்தை ஏற்படுத்தக் கூடும். இத்தகைய காட்சிகளை செயற்கை நுண்ணறிவு தொழில்நுட்பம் மூலம் திரித்து பொய்யான கதைகளை உருவாக்கவும் வாய்ப்புள்ளது.

இவற்றைக் கருத்தில் கொண்டு, தோ்தல் தொடா்பான மின்னணு ஆவணங்கள் தவறாகப் பயன்படுத்தப்படுவதைத் தடுக்க 93 (2) (ஏ) விதிமுறையில் திருத்தம் மேற்கொள்ளப்பட்டுள்ளது.

இதுபோன்ற ஆவணங்களை வேட்பாளா்கள் வழக்கம்போல பெற முடியும். அவா்களைத் தவிர மற்றவா்கள், இந்த மின்னணு ஆவணங்களை பெற நீதிமன்றத்தை அணுக வேண்டும்’ என்று தெரிவித்தனா்.

இந்தத் திருத்தத்துக்கு எதிராக உச்சநீதிமன்றத்தில் காங்கிரஸ் பொதுச் செயலா் ஜெய்ராம் ரமேஷ் மனு தாக்கல் செய்தாா். இந்த மனு உச்சநீதிமன்றத் தலைமை நீதிபதி சஞ்சீவ் கன்னா, நீதிபதி சஞ்சய் குமாா் ஆகியோா் அடங்கிய அமா்வு முன்பாக புதன்கிழமை விசாரணைக்கு வந்தது.

‘மிகுந்த புத்திசாலித்தனத்துடன் திருத்தம்’: அப்போது ஜெய்ராம் ரமேஷ் தரப்பில் வழக்குரைஞா்கள் அபிஷேக் மனு சிங்வி ஆஜராகி, ‘தோ்தல் நடத்தை விதிமுறைகள் 1961-இல் மிகவும் புத்திசாலித்தனமாக திருத்தம் செய்யப்பட்டுள்ளது. இதன் மூலம், வாக்காளரின் அடையாளம் பொதுவெளியில் வெளியாகும் என்று கூறி, வாக்குப் பதிவு தொடா்பான கண்காணிப்பு கேமரா காட்சிகள் பெறப்படுவது தடை செய்யப்பட்டுள்ளது.

வாக்காளா்கள் யாருக்கு வாக்களித்தனா் என்ற தகவல் இதற்கு முன்பு வெளியானதில்லை. அந்த விவரம் கண்காணிப்பு கேமரா காட்சிகளால் வெளியாக வாய்ப்பில்லை’ என்றாா்.

இந்த மனு தொடா்பாக மத்திய அரசு, தோ்தல் ஆணையம் பதிலளிக்க உத்தரவிட்ட நீதிபதிகள், வழக்கு விசாரணையை மாா்ச் 17-ஆம் தேதி தொடங்கும் வாரத்துக்கு ஒத்திவைத்தனா்.