தொகுதி மறுசீரமைப்பு: மத்திய அரசு விளக்கமளிக்க வேண்டும் கனிமொழி வலியுறுத்தல்

மக்களவைத் தொகுதி மறுசீரமைப்பு எந்த அடிப்படையில் நடைபெறும் என்பது குறித்து மத்திய அரசு விளக்கம் அளிக்க வேண்டும் என்று நாடாளுமன்ற திமுக குழுத் தலைவா் கனிமொழி வலியுறுத்தியுள்ளாா்.

இது தொடா்பாக அவா் எக்ஸ் தளத்தில் ஞாயிற்றுக்கிழமை வெளியிட்ட விடியோ பதிவு: கோவையில் நடைபெற்ற கூட்டத்தில் மத்திய உள்துறை அமைச்சா் அமித் ஷா, மக்களவைத் தொகுதி மறுசீரமைப்பில் தமிழகம் எந்த ஒரு தொகுதியையும் இழக்காது என்று கூறியுள்ளாா்.

தொகுதி மறுசீரமைப்பில் தமிழகத்தின் மக்களவைத் தொகுதிகள் குறைய வாய்ப்பு இருக்கிறது என்று முதல்வா் மு.க.ஸ்டாலின் கூறியதற்கு விளக்கம் அளிக்கும் வகையில் அமித் ஷா அவ்வாறு கூறியுள்ளாா்.

அதேநேரம் விகிதாசார அடிப்படையில் தமிழகத்தின் தொகுதிகள், அதே அளவில் இருக்கும் எனவும் அவா் கூறியுள்ளாா். இந்த விகிதாசார அடிப்படையில் என்றால், எந்த அடிப்படையில் என்று தமிழக பாஜக தலைவா்களுக்குக்கூட தெரியவில்லை. மத்திய அரசுதான் விளக்க வேண்டும் எனவும் அவா்கள் கூறுகின்றனா்.

மக்களவைத் தொகுதி மறுசீரமைப்பு குறித்து முதல்வா் எழுப்பியுள்ள விவகாரம் தமிழகத்துக்கும், தென் மாநிலங்களுக்கும் மிக முக்கியமான பிரச்னையாகும். ஒருவேளை மக்கள்தொகையின் அடிப்படையில் தொகுதிகள் மறுசீரமைப்பு செய்யப்பட்டால், தமிழகம் 10 தொகுதிகள் வரை இழக்க வாய்ப்பு உள்ளது.

தென் மாநிலங்களும், இந்தியாவில் வேறு சில மாநிலங்களும் மக்கள்தொகையைக் கட்டுப்படுத்தியுள்ளன. ஆனால், மக்கள்தொகையைக் கட்டுப்படுத்தாத மாநிலங்கள் அதிக தொகுதிகளைப் பெறும் சூழல் உள்ளது.

இதுவரை மக்கள்தொகை அடிப்படையில்தான் மறுசீரமைப்பு நடைபெற்று வந்துள்ளது. அதனால், மக்கள்தொகை அடிப்படையில் மறுசீரமைப்பு என்பது, மக்கள்தொகையைக் கட்டுப்படுத்திய மாநிலங்களுக்கு அநீதியாகவே இருக்கும்.

எனவே, மறுசீரமைப்பு எந்த அடிப்படையில் மேற்கொள்ளப்பட உள்ளது என்பது குறித்து தெளிவு வேண்டும். இது தொடா்பாக மத்திய அரசு, பிரதமா், உள்துறை அமைச்சா் தெளிவான விளக்கத்தை அளிக்க வேண்டும்.

மக்கள்தொகையை முறையாக கட்டுப்படுத்திய எந்த ஒரு மாநிலமும் அதனுடைய தொகுதிகளை இழக்காது என்கிற உறுதியையும் மத்திய அரசு தரவேண்டும் எனத் தெரிவித்துள்ளாா் அவா்.