தொடா் மழையால் சூளைகளில் செங்கல் உற்பத்தி நிறுத்தம்: தொழிலாளா்களுக்கு ஊதியத்துடன் விடுப்பு

திருச்சி மாவட்டத்தில் தொடரும் மழையால் செங்கல் உற்பத்தி முழுவதுமாக நிறுத்தப்பட்டுள்ளது.

திருச்சி மாவட்ட காவிரிக் கரையோரப் பகுதிகளில் மட்டுமே களிமண் செங்கல் சூளைகள் இயங்குகின்றன. குறிப்பாக, திருவளா்ச்சோலை, பனையபுரம், ஸ்ரீரங்கம், கொண்டயம்பேட்டை, மேலூா், பொன்னுரங்கபுரம், முசிறி, தொட்டியம், லால்குடி உள்ளிட்ட பகுதிகளில் களிமண் கொண்டு செய்யப்படும் சிவப்பு செங்கல் உற்பத்திக் கூடங்கள் 100-க்கும் மேற்பட்டவை உள்ளன. திருவளா்ச்சோலை பகுதியில் சிறிய அளவில் உற்பத்தி செய்யப்படும் செங்கல் சூளைகளும் உள்ளன.

இதுமட்டுமல்லாது துவாக்குடி தொழில்பேட்டை, அரியமங்கலம் தொழில்பேட்டை, மணப்பாறை சிப்காட் மற்றும் மாவட்டத்தின் பல்வேறு தொழில்கூடங்கள் அமைந்த பகுதிகளிலும், புகா்ப் பகுதிகளிலும் பிளை ஆஷ், சிமென்ட் கொண்டு தயாரிக்கப்படும் செங்கல் உற்பத்திக் கூடங்கள் 100-க்கும் மேற்பட்டவை உள்ளன.

களிமண் செங்கல் சூளைகளில் மட்டும் 20 ஆயிரத்துக்கும் மேற்பட்ட தொழிலாளா்கள் நேரடியாகவும், ஆயிரக்கணக்கானோா் மறைமுகமாகவும் வேலைவாய்ப்பு பெறுகின்றனா். இதேபோல, பிளை ஆஷ், சிமென்ட் செங்கல் உற்பத்திக் கூடத் தொழிலை நம்பியும் ஆயிரக்கணக்கானோா் வேலைவாய்ப்பு பெறுகின்றனா்.

செங்கல் உற்பத்திக் கூடங்கள் பெரும்பாலும் திறந்தவெளியிலேயே உள்ளதால் மழைக் காலங்களில் பெரிதும் பாதிப்பைச் சந்திக்க நேரிடுகிறது. குறிப்பாக புயல் சின்னம் உருவாகும்போதும், இடைவிடாது பெய்யும் மழை நாள்களிலும் உற்பத்தியைத் தொடங்க இயலாத நிலையே உள்ளது.

இதுதொடா்பாக, திருவளா்ச்சோலை பகுதியில் களிமண் செங்கல் உற்பத்திக் கூடத்தை நடத்தும் ராமமூா்த்தி கூறுகையில், தீபாவளியைத் தொடா்ந்து மழைக் காலம் என்பதால் குறைந்தது 2 மாதங்களுக்கு செங்கல் உற்பத்தி செய்ய முடியாது. எனவே அதற்கு ஈடு செய்யும் வகையில் தொகையை முன்கூட்டியே தொழிலாளா்களுக்கு வழங்கி விடுமுறை அளித்துவிடுவோம். தொடா் மழையால் இப்போதும் சூளையில் உற்பத்தியில்லை. தொழிலாளா்களும் விடுப்பில் உள்ளனா் என்றாா்.

திருவளா்ச்சோலையில் 4 தலைமுறையைக் கடந்து சூளை நடத்தி வரும் விஷால் கூறுகையில், வழக்கமாக மழைக்காலத்தில் உற்பத்தி இருக்காது. எங்களது சூளையில் நவம்பா், டிசம்பரில் முழுமையாக உற்பத்தி நிறுத்தப்பட்டுள்ளது. ஜனவரி மாதத்தில் பொங்கல் பண்டிகைக்குப் பிறகே உற்பத்தி தொடங்கும். இந்த விடுமுறை காலத்தில் உள்ளூா் தொழிலாளா்கள் இதர கூலி வேலைக்கு சென்றுவிடுவா். மீண்டும் சூளை இயங்கும்போது பணிக்கு வருவா் என்றாா்.

தருமபுரியைச் சோ்ந்த செங்கல் சூளை தொழிலாளி சுரேஷ் கூறுகையில், மழைக்காலம்தான் எங்களுக்கு விடுமுறைக் காலம். முன்தொகையுடன் விடுப்பு கிடைக்கும். இனி ஜனவரி மாதம் தான் தொழிலாளா்கள் அனைவரும் பணிக்குத் திரும்பி முழுவீச்சில் செங்கல் அறுப்பு நடைபெறும் என்றாா்.

துவாக்குடி வாழவந்தான்கோட்டை சிட்கோ தொழில்பேட்டையில் பிளை ஆஷ் செங்கல் உற்பத்திக் கூடம் நடத்தி வரும் மதி கூறுகையில், தொடா் மழை நாள்களில் மட்டுமே உற்பத்தி நிறுத்தப்படும். பிளை ஆஷ் செங்கல் கூடங்கள் மட்டுமல்லாது ஹாலோ பிளாக் கற்கள், பேவா் பிளாக் கற்கள், சிமென்ட் செங்கல், சிமென்ட் சுற்றுச் சுவா் பலகைகள், மழைநீா் சேகரிப்பு மற்றும் கழிவுநீா் சேகரிப்பு தொட்டிகளுக்கான உறைகள் தயாரிக்கும் கூடங்கள் அனைத்துமே தொடா் மழையால் பாதிக்கப்பட்டுள்ளன என்றாா் அவா்.