பள்ளி வளாகத்தில் சுருண்டு விழுந்த 7-ம் வகுப்பு மாணவி; உயிரிழப்புக்கு குடற்புழு மாத்திரை காரணமா?!

பட்டுக்கோட்டை அருகே உள்ள சொக்கநாதபுரம் பகுதியை சேர்ந்தவர்கள் கண்ணன் – பரிமளா தம்பதி. இவர்களது மூன்றாவது மகள் கவிபாலா (12). இவர் பள்ளத்துார் அரசு மேல்நிலைப் பள்ளியில் 7ம் வகுப்பு படித்து வந்தார். இந்நிலையில் நேற்று அழகியநாயகிபுரம் ஆரம்ப சுகாதார நிலைய டாக்டர் குழுவினர் பள்ளிக்கு வந்தனர். இதையடுத்து சுகாதாரத்துறை சார்பில், மாணவர்களுக்கு குடற்புழு நீக்கும் மாத்திரை கொடுத்து விழுங்க வைத்தனர். இந்த மாத்திரையை விழுங்கிய கவிபாலா பள்ளி வளாகத்தில் விளையாடிக்கொண்டு இருந்துள்ளார்.

அப்போது, கவிபாலா மயங்கி சுருண்டு தரையில் விழுந்திருக்கிறார். அவரது மூக்கு மற்றும் வாயில் ரத்தம் வந்துள்ளது. இதைப் பார்த்த சக மாணவிகள் அலறியடித்து ஓடி ஆசிரியர்களிடம் சொல்லியுள்ளனர். உடனடியாக ஆசிரியர் துரைசிங்கம் மற்றும் வீரமணி ஆகியோர் கவிபாலாவை அழகியநாயகிபுரம் அரசு ஆரம்ப சுகாதார நிலையத்துக்கு சிகிச்சைக்காக காரில் தூக்கி சென்றனர். பரிசோதித்த டாக்டர்கள் கவிபாலா ஏற்கனவே இறந்து விட்டதாக கூறியுள்ளனர். இதையடுத்து இறந்த மாணவியின் உடல் உடற்கூறாய்வுக்காக பட்டுக்கோட்டை அரசு மருத்துவமனைக்கு அனுப்பி வைக்கப்பட்டது.

இது குறித்து சேதுபாவாசத்திரம் போலீஸார் விசாரணை நடத்தி வருகின்றனர். இந்நிலையில், மாத்திரை சாப்பிட்ட, புக்கரம்பையை சேர்ந்த 10ம் வகுப்பு மாணவி தியா, ஆண்டிக்காடு பகுதியை சேர்ந்த 11ம் வகுப்பு மாணவி சகாயமேரி இருவருக்கும் வாந்தி, மயக்கம் ஏற்பட்ட நிலையில், அழகியநாயகிபுரம் அரசு ஆரம்ப சுகாதார நிலையத்தில் சிகிச்சைக்காக சேர்க்கப்பட்டனர். இந்த சம்பவம் ஆசிரியர்கள் மற்றும் மாணவர்களிடையே அதிர்ச்சியை ஏற்படுத்தியது. ``எங்களோடு நன்றாக விளையாடியவள் இறந்து விட்டாள்" என, கவிபாலா தோழிகள் புலம்பி அழுதுள்ளனர்.

இந்த நிலையில், கவிபாலா குடும்பத்தினர் மற்றும் கிராம மக்கள் பட்டுக்கோட்டை சாலையில் ஒரு மணி நேரத்துக்கு மேல் மறியல் போராட்டம் நடத்தினர். அப்போது சிலர், ``கவிபாலா விழுங்கியது காலாவதியான மாத்திரையாக இருக்குமோ என்ற சந்தேகம் எங்களுக்குள்ளது. அந்த மாத்திரை மாணவி உயிரை காவு வாங்கி விட்டது" என்று ஆத்திரத்தில் அழுது புலம்பினர். மாணவியின் இறப்புக்கு மாத்திரை காரணமில்லை, உடல்நலக் குறைபாடு தான் காரணம் என டாக்டர்கள் தெரிவித்துள்ளனர்.