பாம்பன் புதிய பாலம்... பயணிகள் ரயில் இயக்க அனுமதி அளித்தது ரயில்வே பாதுகாப்பு வாரியம்!

ராமேஸ்வரம் தீவு பகுதியினை நாட்டின் நில பரப்புடன் இணைக்க கடந்த 100 ஆண்டுகளுக்கு மேலாக இயங்கி வந்த ரயில் பாலம் கடல்காற்றின் அரிமானத்தால் வழு இழந்தது. இதையடுத்து புதிய பாலம் அமைக்க முடிவு செய்யப்பட்டது. ரயில்வேயின் பொதுத்துறை நிறுவனமான ரயில் விகாஸ் நிகம் லிமிடெட் மூலம் கட்டப்பட்டு வரும் இந்த புதிய பாலத்தின் நடுவே 72.5 மீட்டர் லிஃப்டிங் கிர்டர் செங்குத்தாக மின் இயந்திரவியல் சக்தி மூலம் திறந்து கப்பல்களுக்கு வழிவிடும் வகையில் அமைக்கப்பட்டு வருகிறது. (பழைய பாலம் இருபுறமும் ஐந்துக்கும் மேற்பட்ட தொழிலாளர்களுடன் மனித ஆற்றல் மூலம் திறக்கப்படும் என்பது குறிப்பிடத்தக்கது).

இந்த புதிய பாலம் செங்குத்தாக திறக்கப்படும் இந்தியாவின் முதல் பாலமாக அமைய உள்ளது. பெரிய கப்பல்கள் சென்று வரும் வகையில் நடுவில் உள்ள லிப்டிங் கிர்டர் 17 மீட்டர் உயரத்திற்கு மேலே செல்லும்.

இது அருகிலுள்ள சாலை பாலத்திற்கு இணையான உயரம் ஆகும். சுமார் 600-க்கும் மேற்பட்ட தொழிலாளர்கள் இணைந்து பணியாற்றி வரும் இந்த நவீன பாலத்திற்காக கடலில் 333 காங்கிரிட் அடித்தளங்கள், 101 காங்கிரிட் தூண்கள் ஆகியவற்றின் மேல் எதிர்காலத் தேவையை கருத்தில் கொண்டு இரட்டை ரயில் பாதை அமைக்கும் வகையில் அடித்தளமும் தூண்களும் அகலமாக அமைக்கப்பட்டுள்ளன.

ஆனால் தற்போதைய தேவையை கருத்தில் கொண்டு ஒரு ரயில் பாதை மட்டுமே அமைக்கப்படுகிறது. மேலும் ரயில்களை மின்சாரம் மூலம் இயக்கும் வகையில் மின் மயமாக்கல் பணிகளும் மேற்கொள்ளப்பட்டுள்ளன.

இந்நிலையில் புதிய பாலத்திற்கான பணிகள் முழுமையடைந்த நிலையில் பல்வேறு வகையான சோதனை ஓட்டங்கள் நடத்தப்பட்டு பாலத்தின் உறுதி தன்மை குறித்து ஆய்வு மேற்கொள்ளப்பட்டது. இதனை தொடர்ந்து கடந்த இரண்டு வாரங்களுக்கு முன் தென் மண்டல ரயில்வே பாதுகாப்பு ஆணையர் செளத்திரி தலைமையில் சிறப்பு ரயில் இயக்கப்பட்டு ஆய்வு மேற்கொள்ளப்பட்டது. இதன் அடிப்படையில் கிடைத்த பதிவுகளை கொண்டு பாலத்தின் உறுதி தன்மை திருப்திகரமாக இருந்தது தெரியவந்தது.

இதையடுத்து பல்வேறு கட்டுப்பாடுகளுடன் புதிய பாலத்தில் பயணிகள் ரயிலை இயக்குவதற்கான அனுமதியினை தென் மண்டல ரயில்வே பாதுகாப்பு ஆணையர் செளத்ரி வழங்கியுள்ளார். இதன்படி புதிய பாலத்தில் அதிகபட்சமாக மணிக்கு 75 கி.மீ வேகத்தில் இயக்கவும், கப்பல்கள் செல்ல வழி ஏற்படுத்தும் தூக்கு பாலத்தில் மட்டும் 50 கி.மீ வேகத்தில் இயக்கவும் அனுமதி அளிக்கப்பட்டுள்ளது. பாம்பன் கடலில் அமைந்துள்ள பால பகுதிகளில் காற்றின் வேகம் 100 கி.மீ அளவில் இருந்தால் செங்குத்து பாலத்தினை ஏற்றி இறக்க கூடாது எனவும், மணிக்கு 58 கி.மீ வேகத்தில் காற்று வீசினால் ரயிலை இயக்க கூடாது எனவும் அந்த ஆய்வறிக்கையில் கூறப்பட்டுள்ளது.

தென் மண்டல ரயில்வே பாதுகாப்பு ஆணையரின் இந்த அனுமதியை தொடர்ந்து விரைவில் ராமேஸ்வரத்திற்கு மீண்டும் ரயில் சேவை தொடங்கும் என எதிர்பார்க்கப்படுகிறது. அதே நேரத்தில் ராமேஸ்வரம் ரயில் நிலையத்தில் மேற்கொள்ளப்பட்டு வரும் புனரமைப்பு பணிகள் இன்னும் முழுமை அடையவில்லை. இதனால் ராமேஸ்வரத்திற்கு குறிப்பிட்ட சில ரயில்களே இயக்கும் நிலை உள்ளது. எனவே ராமேஸ்வரம் ரயில் நிலைய புனரமைப்பு பணிகளை விரைவாக முடித்து அனைத்து ரயில்களும் வந்து செல்ல நடவடிக்கை எடுக்க வேண்டும் என பயணிகள் வேண்டுகோள் விடுத்துள்ளனர்.