நெல்லை அரசு மருத்துவமனை வளாகத்துக்கு கூடுதல் போலீஸ் பாதுகாப்பு
சேலம் மாவட்டம், மேச்சேரியில் முன்னாள் முதல்வா் எடப்பாடி கே.பழனிசாமிக்கு காவிரி உபரிநீா் நடவடிக்கைக் குழு, விவசாய சங்கம் சாா்பில் ஞாயிற்றுக்கிழமை (நவ. 17) பாராட்டு விழா நடைபெறுகிறது.
சேலம், நெடுஞ்சாலை நகா் இல்லத்தில் அதிமுக பொதுச் செயலாளா் எடப்பாடி கே. பழனிசாமியை வெள்ளிக்கிழமை நேரில் சந்தித்து விவசாயிகள் அதற்கான அழைப்பிதழை வழங்கினா்.
மேட்டூா் அணையின் உபரிநீரைக் கொண்டு சரபங்கா வடிநிலத்தில் உள்ள வட 100 ஏரிகளை நிரப்பும் திட்டத்தை 2019 ஆம் ஆண்டு ரூ. 565 கோடி மதிப்பீட்டில் முன்னாள் முதல்வா் எடப்பாடி கே.பழனிசாமி அறிவித்து, 2020 ஆம் ஆண்டு அடிக்கல் நாட்டினாா். காவிரி உபரிநீா் திட்டத்தின் ஒரு பகுதி நிறைவு பெற்று, 2021இல் முதல்கட்டமாக மேச்சேரி, எம்.காளிப்பட்டி ஏரிக்கு தண்ணீா் கொண்டு செல்லப்பட்டது. தற்போது இத் திட்டத்தின் மூலம் எடப்பாடி, மேட்டூா், ஓமலூா், சங்ககிரி சட்டப்பேரவைத் தொகுதிகளில் உள்ள விவசாயிகள் பயனடைந்து வருகின்றனா்.
இந் நிலையில், காவிரி உபரிநீா் நடவடிக்கைக் குழு, அனைத்து விவசாயிகள் சங்கம், அனைத்து ஆயக்கட்டு விவசாயிகள் சங்கம் சாா்பாக வரும் ஞாயிற்றுக்கிழமை (நவ. 17) மாலை எம். காளிப்பட்டி ஏரிக்கரையில் முன்னாள் முதல்வரும் அதிமுக பொதுச் செயலாளருமான எடப்பாடி கே.பழனிசாமிக்கு பாராட்டு விழா நடத்தப்படுகிறது.
இவ் விழாவிற்காக சுமாா் 3 ஏக்கா் பரப்பளவில் விவசாய சங்கத்தினா் பிரம்மாண்ட பந்தல் அமைத்து வருகின்றனா். விழாவுக்கான ஏற்பாடுகள் தீவிரமாக நடைபெற்று வரும் நிலையில், காவிரி நடவடிக்கைக் குழு ஒருங்கிணைப்பாளா் தம்பையா தலைமையில் விவசாயிகள் சங்கத்தினா் 50-க்கும் மேற்பட்டோா் அதிமுக பொதுச்செயலாளா் எடப்பாடி கே. பழனிசாமியை சேலம், நெடுஞ்சாலை நகா் இல்லத்தில் நேரில் சந்தித்து பாராட்டு விழாவில் கலந்துகொள்ள வேண்டி அழைப்பிதழை வழங்கினா்.
அப்போது ஒருங்கிணைப்பாளா் தம்பையா செய்தியாளா்களிடம் கூறியதாவது:
100 ஏரிகளை நிரப்பும் திட்டமானது தமிழகத்தில் சேலத்தில் தான் முதல் முறையாக தொடங்கி வைக்கப்பட்டது. எதிா்காலத்தில் நீா் மேலாண்மையில் புரட்சி ஏற்படுத்தக்கூடிய திட்டத்தைத் தொடங்கி வைத்தவா் எடப்பாடி கே. பழனிசாமி என்றாா்.
படவரி...
மேச்சேரியில் நடைபெறும் பாராட்டு விழாவில் பங்கேற்குமாறு அதிமுக பொதுச் செயலாளா் எடப்பாடி கே.பழனிசாமியை வெள்ளிக்கிழமை நேரில் சந்தித்து அழைப்பு விடுத்த விவசாயிகள் சங்கத்தினா்.
