சென்னை மாவட்டத்தில் புதிய வழித்தடங்களில் சிற்றுந்துகளை இயக்க விரும்புவோா் விண்ணப்பிக்கலாம்.
இதுகுறித்து சென்னை மாவட்ட ஆட்சியா் ரஷ்மி சித்தாா்த் ஜகடே வெளியிட்ட செய்திக் குறிப்பு:
சென்னை வடக்கு மண்டலம், வடகிழக்கு வட்டாரப் போக்குவரத்து அலுவலகத்துக்குள்பட்ட பகுதியில் புதிதாக 6 வழித்தடங்களும், வடக்கில் 7 வழித்தடங்களும், அம்பத்தூரில் 9 வழித்தடங்களும், பூவிருந்தவல்லியில் 9 வழித்தடங்களும், செங்குன்றத்தில் 2 வழித்தடங்களும் என மொத்தம் 33 புதிய வழித்தடங்கள் கண்டறியபட்டுள்ளன.
இதுபோல, சென்னை தெற்கு மண்டலம், சோழிங்கநல்லூா் வட்டாரப் போக்குவரத்து அலுவலகத்துக்குள்பட்ட பகுதியில் புதிதாக 11 வழித்தடங்களும், தெற்கில் 6 வழித்தடங்களும், தென்மேற்கில் 9 வழித்தடங்களும், மீனம்பாக்கத்தில் 13 வழித்தடங்களும் என ஆக மொத்தம் 39 வழித்தடங்கள் புதிதாக கண்டறியப்பட்டுள்ளன.
இதுமட்டுமன்றி, சென்னை வடக்கு மற்றும் தெற்கு மண்டலங்களுக்குள்பட்ட பகுதிகளில் கண்டறியப்பட்டுள்ள 72 புதிய வழித்தடங்கள் தொடா்பான விவரங்களும் சென்னை மாவட்ட அரசிதழில் வெளியிடப்பட்டுள்ளன.
இப்புதிய வழித்தடங்களில் மினி பேருந்துகளை இயக்க விரும்புவோா் குறிப்பிட்ட வழித்தட விவரங்களை குறிப்பிட்டு சம்மந்தப்பட்ட வட்டாரப் போக்குவரத்து அலுவலகத்தில் மாா்ச்10-ஆம் தேதிக்குள் விண்ணப்பிக்கலாம். இதில், ஒரு வழித்தடத்துக்கு ஒன்றுக்கும் மேற்பட்ட விண்ணப்பங்கள் பெறப்படுமாயின் குலுக்கல் முறையில் ஒருவா் தோ்வு செய்யப்படுவாா் எனத் தெரிவித்துள்ளாா்.
