புதுச்சேரியைச் சேர்ந்த பாஜக நியமன எம்எல்ஏக்கள் 3 பேர் தங்களது பதவியை ராஜிநாமா செய்வதற்கான கடிதத்தை பேரவைத் தலைவர் செல்வத்திடம் கொடுத்துள்ளதால் புதுச்சேரி அரசியல் வட்டாரத்தில் பரபரப்பு ஏற்பட்டுள்ளது.
புதுச்சேரியில் கடந்த 2021 ஆம் ஆண்டு சட்டப்பேரவைத் தேர்தலில் என்.ஆர்.காங்கிரஸ் மற்றும் பாஜக கூட்டணி வெற்றி பெற்று ஆட்சியமைத்தது. என்.ஆர்.காங்கிரஸ் தலைமையில் ஆட்சி நடைபெற்று வரும் நிலையில், முதலமைச்சராக ரங்கசாமியும், என்.ஆர். காங்கிரஸ் கட்சியை சேர்ந்த இருவருக்கு அமைச்சர் பதவியும், துணை பேரவைத் தலைவர் பதவியும் கொடுக்கப்பட்டது.
அதேபோல் பாஜகவில் இரண்டு அமைச்சர்கள் மற்றும் பேரவைத் தலைவர் பதவி வழங்கப்பட்டது. தொடர்ந்து பாஜக கட்சியை சேர்ந்த ராமலிங்கம், அசோக்பாபு மற்றும் வெங்கடேசன் ஆகிய மூவருக்கு நியமன சட்டமன்ற உறுப்பினர் பதவி வழங்கப்பட்டது. கடந்த நான்கு ஆண்டுகளாக இவர்கள் நியமன சட்டமன்ற உறுப்பினராக செயல்பட்டு வந்தனர்.
இந்த நிலையில் 2026 சட்டமன்றத் தேர்தல் வருவதற்கு இன்னும் 8 மாதங்கள் உள்ள நிலையில், தற்போது பாஜக நியமன சட்டமன்ற உறுப்பினர்கள் ராமலிங்கம், வெங்கடேசன், அசோக்பாபு ஆகியோர் தங்களது பதவியை ராஜிநாமா செய்யவற்காக சட்டப்பேரவைத் தலைவர் செல்வத்துடன் 1 மணி நேரத்திற்கு மேலாக ஆலோசனை நடத்தினர்.
இதில் அவர்கள் தங்கள் நியமன சட்டமன்ற உறுப்பினர் பதவியை ராஜிநாமா செய்து, அதற்கான கடிதத்தை சட்டப்பேரவை செயலர் தயாளனிடம் சட்டப்பேரவை தலைவர் செல்வம் முன்னிலையில் வழங்கியுள்ளனர்.
முன்னதாக இன்று(ஜூன் 27) காலை புதுச்சேரி வந்த பாஜக மேலிட பொறுப்பாளர் நிர்மல்குமார் சூரானாவிடம் உள்துறை அமைச்சர் நமச்சிவாயம், கட்சியின் மாநிலத் தலைவர் செல்வகணபதி எம்பி மற்றும் பாஜக நிர்வாகிகள் கட்சித் தலைமை அலுவலகத்தில் 2 மணி நேரத்திற்கு மேலாக ஆலோசனை நடத்தினர்.
தொடர்ந்து அமைச்சர் நமச்சிவாயம், சட்டப்பேரவைத் தலைவர் செல்வம், கட்சி மாநில தலைவர் செல்வகணபதி எம்.பி ஆகியோர் சட்டப்பேரவையில் முதலமைச்சர் ரங்கசாமியை சந்தித்து ஆலோசனை நடத்தினர். பின்னர் சட்டப்பேரவைத் தலைவர் செல்வம் அறையில் நியமன சட்டமன்ற உறுப்பினர்கள் மூன்று பேரும் தங்களது ராஜினாமா கடிதத்தை வழங்கியுள்ளனர்.
மேலும், புதிய நியமன சட்டமன்ற உறுப்பினர்களாக காரைக்காலைச் சேர்ந்த ராஜசேகரன், ஊசுடு தொகுதியை சேர்ந்த முன்னாள் சட்டமன்ற உறுப்பினர் தீப்பாய்ந்தான், பாஜக மூத்த நிர்வாகி முதலியார்பேட்டை செல்வம் ஆகியோர் நியமிக்கப்பட உள்ளதாக தகவல்கள் தெரிவிக்கின்றன.
There has been a stir in Puducherry political circles as three BJP-nominated MLAs from Puducherry have submitted their resignation letters to Assembly Speaker Selvam.
இதையும் படிக்க: முதல்வர் பதவி யாருக்கு? தவெகவுடன் கூட்டணியா? - ராஜேந்திர பாலாஜி பதில்!
