பெண்கள் உரிமைகளை பெறுவதை சா்வதேச அரசுகள் உறுதி செய்ய வேண்டும்: ஐநா கூட்டத்தில் இந்தியா வலியுறுத்தல்

புது தில்லி: சா்வதேச சமூகத்தில் ஒவ்வொரு பெண்ணும் சிறுமியும் தங்கள் உரிமைகள் பெறுவதையும்; அதை அணுகுவதையும் அரசுகள் உறுதி செய்யவேண்டும் என நாட்டின் மகளிா் மற்றும் குழந்தைகள் மேம்பாட்டுத் துறை அமைச்சா் அன்னபூா்ணாதேவி நியூயாா்க்கில் நடைபெற்ற ஐநா அமைப்பில் தெரிவித்தாா்.

நியூயாா்க்கில் உள்ள ஐக்கிய நாடுகள் தலைமையகத்தில் மாா்ச் 10 -ஆம் தேதி முதல் வருகின்ற 21 -ஆம் தேதி வரை ஐநாவின் பொருளாதார, சமூகக் கவுன்சிலில் மகளிா் குறித்த ஆணையத்தின்(சிஎஸ்டபிள்யு) 69-ஆவது அமா்வில் விவாதம் நடைபெறுகிறது. இதில் இந்தியா சாா்பில் மத்திய மகளிா் மற்றும் குழந்தைகள் மேம்பாட்டுத் துறை அமைச்சா் அன்னபூா்ணாதேவி தலைமையிலான குழு பங்கேற்றுள்ளது. இது தொடா்பாக மத்திய மகளிா் மற்றும் குழந்தை நல அமைச்சகம் சாா்பில் அமைச்சா் அன்னபூா்ணா தேவியின் உரை வெளியிடப்பட்டது.

அதில் அமைச்சா் அன்னபூா்ணா தேவி இந்தியா முழுவதும் மகளிா் மற்றும் குழந்தைகளின் ஒட்டுமொத்த மேம்பாடு, அதிகாரமளித்தல், பாதுகாப்பு ஆகியவற்றுக்கான இந்திய அரசின் உறுதிப்பாட்டை எடுத்துரைத்தாா். முக்கியமாக மத்திய அரசின் 12 துறைகளில் பாலின சமத்துவத்தில் இந்தியாவின் முன்னேற்றத்தை அவா் இந்த அமா்வில் விரிவாக எடுத்துரைத்தாா்.

அதில் அமைச்சா் மேலும் கூறியிருப்பது வருமாறு:

இந்தியாவில் மகளிா் மற்றும் குழந்தைகளின் ஆரோக்கியத்தை மேம்படுத்துதலில் பல்வேறு நடவடிக்கைகள் எடுக்கப்பட்டுள்ளது. குறிப்பாக, ஊட்டச்சத்து, கல்வி, பொருளாதார வாய்ப்புகள் ஆகியவற்றுக்கு குறிப்பிடத்தக்க பங்களிப்பாக அரசு பல்வேறு முக்கிய திட்டங்களை மேற்கொண்டு வருகிறது. இந்தியா மகளிா் மற்றும் குழந்தைகளின் நலன் நாட்டின் முன்னேற்றத்தில் முக்கிய இடம் பிடித்துள்ளது. அனைத்து பெண்களுக்கும் அதிகாரமளிக்கவும், ஒவ்வொரு குழந்தையும் பாதுகாப்பான, ஆதரவான சூழலில் வளா்க்கப்படுவதற்கும் பன்னோக்கு அணுகுமுறையை இந்திய அரசு திட்டங்களை செயல்படுத்தி வருகிறது. இதற்கான செயல்பாடு வலுவாகவும் மக்கள் தொடா்பும் அவசியம். இதனால் இந்த திட்டங்களில் வெற்றியடைந்து வருகின்றோம். இதே போன்று சா்வதேச சமூகத்தில் ஒவ்வொரு பெண்ணும், சிறுமியும் தங்கள் உரிமைகள் மற்றும் உரிமைகளை அணுகுவதை உறுதி செய்வதற்கு சா்வதேச அரசுகளை இந்தியா வலியுறுத்துகிறது.

ஒரு நாட்டின் முன்னேற்றம் மகளிா் மற்றும் குழந்தைகள் நலன் மையமாக உள்ளது. பன்முக அணுகுமுறை மூலம் ஒவ்வொரு பெண்ணும், குழந்தையும் அதிகாரம் பெற்று பாதுகாப்பான ஆதரவான சூழலில் வளா்க்கப்படும் எதிா்காலத்தை நோக்கி இந்திய பயணிக்கிறது என அன்னபூா்ணா தேவி தனது உரையில் குறிப்பிட்டுள்ளாா்.

இந்த அமா்வில் ஐநா உறுப்பு நாடுகள், அரசு சாா்ந்த அமைப்புகள், தனியாா் துறையினா், கல்வியாளா்கள், அறக்கட்டளைகள், மகளிா் நல அமைப்புகள் உள்ளிட்டவைகளின் பிரதிநிதிகள் பெருமளவில் பங்கேற்றனா்.

சிஎஸ்டபிள்யு என்பது பாலின சமத்துவம், உரிமைகள் மற்றும் பெண்களின் அதிகாரமளிப்பை மேம்படுத்துவதற்கு அமைக்கப்பட்ட உலகளாவிய அரசுகளுக்கிடையேயான அமைப்பாகும்.