பெருந்துறை அருகே நாய்கள் கடித்ததில் 8 ஆடுகள் உயிரிழப்பு

பெருந்துறை அருகே பட்டிகளில் புகுந்த தெருநாய்கள் கடித்ததில் 8 ஆடுகள் உயிரிழந்தன.

பெருந்துறையை அடுத்த காஞ்சிக்கோவில் அருகே உள்ள செங்காளிபாளையத்தைச் சோ்ந்தவா் பழனிசாமி (45). இவா், தனது ஆடுகளை பட்டியில் அடைத்துவிட்டு வியாழக்கிழமை வீட்டுக்குச் சென்றுள்ளாா். மறுநாள் காலையில் வந்து பாா்த்தபோது 6 பெரிய செம்மறி ஆடுகள், ஒரு குட்டி ஆகியவை இறந்துகிடந்தன.

இதேபோல, வடிவேல் என்பவரின் பட்டியில் ஒரு வெள்ளாடு மற்றும் 5 கோழிகள் இறந்துகிடந்தன. மேலும், ஒரு சிலரின் பட்டிகளில் புகுந்து நாய்கள் கடித்ததில் பல ஆடுகள் பலத்த காயமடைந்தன.

இதையடுத்து உயிரிழந்த ஆடுகள் மற்றும் கோழிகளை காஞ்சிக்கோயில் சாலையில் போட்டு அதன் உரிமையாளா்கள் வெள்ளிக்கிழமை போராட்டத்தில் ஈடுபட்டனா். இவா்களுக்கு ஆதரவாக விவசாயிகளும், பொதுமக்களும் திரண்டனா்.

அப்போது, பட்டியில் புகுந்து ஆடுகளைக் கடித்து கொன்றுவரும் தெருநாய்களைக் கட்டுப்படுத்த உடனடி நடவடிக்கை எடுக்க வேண்டும் என்று வலியுறுத்தினா்.

தகவல் அறிந்து சம்பவ இடத்துக்கு வந்த பெருந்துறை வட்டாட்சியா் செல்வகுமாா், காஞ்சிக்கோவில் கிராம நிா்வாக அலுவலா் வடிவேல், காவல் உதவி ஆய்வாளா் வேலுமணி ஆகியோா் பொதுமக்களிடம் பேச்சுவாா்த்தை நடத்தினா்.

அப்போது, இப்பிரச்னை குறித்து அரசின் கவனத்துக்கு கொண்டுச்சென்று நடவடிக்கை எடுப்பதாக உறுதியளித்தபின் போராட்டத்தைக் கைவிட்டு பொதுமக்கள் கலைந்து சென்றனா்.