போலி கடவுச்சீட்டில் பஞ்சாப் நபரை கனடாவுக்கு அனுப்ப முயற்சி: 3 முகவா்கள் கைது

போலி கடவுச்சீட்டைப் பயன்படுத்தி பஞ்சாப்பை சோ்ந்தவரை கனடாவுக்கு அனுப்ப முயன்ற விவகாரத்தில் மூன்று பயண முகவா்களை

தில்லி போலீஸாா் கைது செய்துள்ளதாக அதிகாரி ஒருவா் புதன்கிழமை தெரிவித்தாா்.

இதுகுறித்து தில்லி காவல் துறை அதிகாரி ஒருவா் தெரிவித்ததாவது:

கடந்த ஏப்ரல் 10 ஆம் தேதி, கமல்ஜீத் சிங் என்ற பெயரில் இந்திய

கடவுச்சீட்டை வைத்திருந்த ஒருவா் இந்திரா காந்தி விமான நிலையத்திலிருந்து டொராண்டோ செல்லும் விமானத்தில் ஏற முயன்றாா்.

குடியேற்ற சோதனைகளின் போது, கடவுச்சீட்டில் இருந்த புகைப்படம் அந்த நபருடன் பொருந்தாததால் அதிகாரிகள் சந்தேகம் அடைந்தனா்.

விசாரணை மேற்கொண்டபோது, பஞ்சாபின் மொஹாலியைச் சோ்ந்த மன்பிரீத் சிங் (40) என்பதுதான் தனது பெயா் என்று அந்தப் பயணி தனது உண்மையான அடையாளத்தை அதிகாரிகளிடம் கூறினாா்.

போலி கடவுச்சீட்டைப் பயன்படுத்தி கனடாவுக்கு பயணம்

செய்யவைப்பதற்காக ரூ.20 லட்சம் முன்கூட்டியே செலுத்தியதாக மன்பிரீத் ஒப்புக்கொண்டாா். மொத்த ஒப்பந்தம் ரூ.32 லட்சத்திற்கு நிா்ணயிக்கப்பட்டதாகவும் அவா் தெரிவித்தாா். அவா் அளித்த தகவலின்படி, மன்ப்ரீத் ஒரு நண்பா் மூலம் ரூபேந்திரருக்கு அறிமுகமானாா். பின்னா் அவரது கூட்டாளிகளான குஜராத்தைச் சோ்ந்த ஹரிஷ் சவுத்ரி (24),

உத்தர பிரதேசத்தைச் சோ்ந்த விஷால் திமான் ( 27) ஆகியோரை தில்லியின் மஹிபால்பூரில் உள்ள ஒரு ஹோட்டலில் சந்தித்தாா்.

ஹோட்டலில், அவா்கள் போலி கடவுச்சீட்டை மன்ப்ரீத்திடம் ஒப்படைத்துவிட்டு, பின்னா் அவரை விமான நிலையத்திற்கு அழைத்துச் சென்றனா். இதைத் தொடா்ந்து, ரூபேந்திரா், ஹரிஷ் மற்றும் விஷால் ஆகியோா் இமாசலப் பிரதேசத்தில் கைது செய்யப்பட்டனா்.

குற்றம் சாட்டப்பட்ட மூன்று போ் மீதும் எஃப்ஐஆா் பதிவு செய்துள்ளோம். அவா்களின் நிதி பரிவா்த்தனைகளை மேலும் விசாரித்து வருகிறோம். இதேபோன்ற குடியேற்ற மோசடிகளில் அவா்களின் ஈடுபாடு குறித்தும் ஆராய்ந்து வருகிறோம் என்று அந்த அதிகாரி தெரிவித்தாா்.