மகளிா் விடியல் பயணத் திட்டத்தில் 7 புதிய பேருந்துகள்: அமைச்சா் தொடங்கிவைத்தாா்

தமிழக அரசின் மகளிா் விடியல் பயணத் திட்டத்தில் திருச்சியில் 7 புதிய பேருந்துகளை பள்ளிக் கல்வித் துறை அமைச்சா் அன்பில் மகேஸ் பொய்யாமொழி சனிக்கிழமை தொடங்கிவைத்தாா்.

திருச்சி சத்திரம் பேருந்து நிலையத்தில் நடைபெற்ற நிகழ்வில் மத்தியப் பேருந்து நிலையத்திலிருந்து திருவெறும்பூா் என்ஐடி வழியாக துவாக்குடி வரை செல்லும் நகரப் பேருந்து, திருச்சியில் இருந்து விராலிமலை துவரங்குறிச்சி வழியாக மதுரை செல்லும் 2 புகா்ப் பேருந்துகள்,

திருச்சியில் இருந்து திண்டுக்கல் தேனி வழியாக கம்பம் செல்லும் புகா்ப் பேருந்து, மணப்பாறையில் இருந்து திருச்சி கரூா் வழியாக திருப்பூா் செல்லும் புகா்ப் பேருந்து என 5 பேருந்துகளை அவா் தொடக்கிவைத்தாா்.

இதேபோல, திருவெறும்பூா் வட்டம், பொன்மலைப்பட்டியில் திருச்சி மண்டல அரசுப் போக்குவரத்துக் கழகத்தின் சாா்பில், தீரன் நகா் கிளையின் மூலம் கொட்டப்பட்டு இந்திரா நகா் பகுதி பள்ளி, கல்லூரி மாணவ, மாணவிகள் பயன்பெறும் வகையிலும், பொதுமக்கள் நேரடியாக மத்திய மற்றும் சத்திர பேருந்து நிலையம் செல்ல ஏதுவாகவும் மகளிா் விடியல் பயண 2 புதிய பேருந்துகளையும் தொடங்கி வைத்தாா்.

இரு பேருந்துகளும் பொன்மலைப்பட்டி ( வழி- கொட்டப்பட்டு, இந்திரா நகா், மத்திய பேருந்து நிலையம்) சத்திரம் பேருந்து நிலையம் (வழி- பாலக்கரை, மத்திய பேருந்து நிலையம்) பொன்மலைப்பட்டி என்ற வழித்தடத்தில் இயக்கப்படுகிறது.

விழாவில் அரசுப் போக்குவரத்துக் கழக மண்டலப் பொது மேலாளா் டி. சதீஷ்குமாா், துணை மேலாளா் சாமிநாதன், ரவி, திருச்சி மாநகராட்சி மண்டலக் குழுத் தலைவா் மு. மதிவாணன் மற்றும் பேருந்து நடத்துநா்கள், ஓட்டுநா்கள், போக்குவரத்து தொழிலாளா்கள் கலந்து கொண்டனா்.

பேருந்துகளை தொடங்கிவைத்த அமைச்சா் அன்பில் மகேஸ் பொய்யாமொழி பேருந்தில் பயணச்சீட்டு எடுத்து சிறிது தூரம் பயணம் செய்தாா். மேலும் பேருந்துப் பயணிகளுக்கும், பொதுமக்களுக்கும் இனிப்பு வழங்கினாா்.