மகாராஷ்டிர புதிய முதல்வா்: போட்டியிலிருந்து விலகினாா் ஷிண்டே

மகாராஷ்டிர முதல்வா் பதவிக்கான போட்டியிலிருந்து சிவசேனை கட்சித் தலைவா் ஏக்நாத் ஷிண்டே விலகினாா்.

‘புதிய முதல்வரைத் தோ்வு செய்வதில் பிரதமா் மோடி மற்றும் மத்திய உள்துறை அமைச்சா் அமித் ஷாவின் முடிவுக்கு கட்டுப்படுவேன்’ என்று அவா் புதன்கிழமை தெரிவித்ததன் மூலம் இது உறுதியாகியுள்ளது.

இதையடுத்து, பாஜகவில் இருந்து புதிய முதல்வா் தோ்வாவதில் இருந்த தடைகள் விலகியுள்ளது என அக்கட்சி வட்டாரங்கள் தெரிவித்தன.

288 உறுப்பினா்களைக் கொண்ட மகாராஷ்டிரத்தில் கடந்த நவ. 20-ஆம் தேதி ஒரே கட்டமாக தோ்தல் நடைபெற்றது. நவ. 23-ஆம் தேதி வாக்குகள் எண்ணப்பட்டு முடிவுகள் அறிவிக்கப்பட்டன. பாஜக தலைமையிலான ‘மகாயுதி’ கூட்டணி 230 இடங்களைக் கைப்பற்றி ஆட்சியைத் தக்கவைத்தது.

இக்கூட்டணியில் 132 இடங்களுடன் பாஜக தனிப்பெரும் கட்சியாக உருவெடுத்தது. முதல்வா் ஏக்நாத் ஷிண்டே தலைமையிலான சிவசேனை 57 இடங்களையும், அஜீத் பவாா் தலைமையிலான தேசியவாத காங்கிரஸ் 41 இடங்களையும் கைப்பற்றின.

மாநில ஆளுநா் சி.பி.ராதாகிருஷ்ணனை செவ்வாய்க்கிழமை சந்தித்த முதல்வா் ஏக்நாத் ஷிண்டே, தனது ராஜிநாமா கடிதத்தை அளித்தாா். ஷிண்டேவின் ராஜிநாமாவை ஏற்றுக் கொண்ட ஆளுநா், புதிய முதல்வா் பதவியேற்கும் வரை பொறுப்பு முதல்வராகச் செயல்படுமாறு கேட்டுக் கொண்டாா்.

வலுவான பெரும்பான்மையுடன் வெற்றி பெற்ற போதிலும், புதிய முதல்வரைத் தோ்வு செய்வதில் கூட்டணிக் கட்சிகள் இடையே கருத்தொற்றுமை எட்டப்படாமல் இருந்தது. ஷிண்டே முதல்வராக நீடிக்க வேண்டுமென அவரது கட்சியினா் வலியுறுத்தி வந்தனா்.

‘தடையாக இருக்க மாட்டேன்’: இந்தச் சூழலில், தாணேயில் செய்தியாளா்களுக்கு ஷிண்டே புதன்கிழமை பேட்டியளித்தாா். அப்போது, அவா் கூறியதாவது:

பிரதமா் மோடி மற்றும் மத்திய உள்துறை அமைச்சா் அமித் ஷாவிடம் தொலைபேசி மூலம் பேசினேன். அப்போது, அடுத்த முதல்வா் குறித்து அவா்கள் எடுக்கும் முடிவுக்கு கட்டுப்படுவேன் என்றும், இந்த விஷயத்தில் நான் தடையாக இருக்க மாட்டேன் என்றும் தெரிவித்தேன்.

அடுத்த முதல்வரைத் தோ்வு செய்வதில் பாஜகவின் முடிவுக்கு சிவசேனை முழு ஆதரவு அளிக்கும். எங்களது தரப்பில் எந்தத் தடையும் இருக்காது.

‘அதிருப்தி இல்லை’: முதல்வா் பதவி விஷயத்தில் நான் அதிருப்தியில் இருப்பதாக வெளியாகும் தகவல்களில் உண்மையில்லை. கூட்டணியில் யாருக்கும் அதிருப்தி இல்லை. மத்திய உள்துறை அமைச்சா் அமித் ஷாவை தில்லியில் வியாழக்கிழமை சந்திக்கவுள்ளேன். அப்போது, அனைத்து முடிவுகளும் இறுதி செய்யப்படும்.

முதல்வராக எனது இரண்டரை ஆண்டு பதவிக் காலத்துக்கு ஆதரவு அளித்ததற்காக, பிரதமா் மோடி மற்றும் உள்துறை அமைச்சா் அமித் ஷாவுக்கு நன்றி தெரிவிக்கிறேன் என்றாா் ஷிண்டே.

புதிய முதல்வா் ஃபட்னவீஸ்?: ஷிண்டேயின் இந்த அறிவிப்பைத் தொடா்ந்து, பாஜகவில் இருந்து புதிய முதல்வா் தோ்வு செய்யப்படுவதற்கான தடைகள் விலகியுள்ளதாக அக்கட்சி வட்டாரங்கள் தெரிவித்தன. பாஜக மூத்த தலைவா் தேவேந்திர ஃபட்னவீஸ் அடுத்த முதல்வராக அதிக வாய்ப்புள்ளதாகக் கூறப்படுகிறது.