மகாராஷ்டிரா: `மகனுக்குத் துணை முதல்வர் பதவியா?' - பாஜக-வுடன் பேச்சுவார்த்தை நடத்தும் ஷிண்டே!

மகாராஷ்டிரா சட்டமன்றத் தேர்தலில் பா.ஜ.க கூட்டணி அமோக வெற்றி பெற்றுள்ளபோதிலும், ஆட்சியமைப்பதில் தாமதம் ஏற்பட்டு வருகிறது. புதிய அரசில் யார் முதல்வர் என்பதிலும், அமைச்சர் பதவிகளை பகிர்ந்து கொள்வதிலும் கூட்டணிக் கட்சிகளிடையே கருத்து வேறுபாடு இருந்து வருகிறது. இது தொடர்பாக டெல்லியில் மத்திய அமைச்சர் அமித் ஷா முன்னிலையில் துணை முதல்வர் தேவேந்திர பட்னாவிஸ், அஜித் பவார் மற்றும் முதல்வர் ஏக்நாத் ஷிண்டே ஆகியோர் சந்தித்து பேசினார்கள். ஆனால் இந்த பேச்சுவார்த்தையில் இறுதி உடன்பாடு எட்டப்படவில்லை. முதல்வர் பதவி மட்டும் பா.ஜ.கவிற்கு என்று முடிவு செய்யப்பட்டது. அதேசமயம் அமைச்சர் பதவியை பகிர்ந்து கொள்வதில் சிவசேனா மற்றும் பா.ஜ.க இடையே கருத்து வேறுபாடு இருந்து வருகிறது. இதனால் கடந்த சில நாட்களுக்கு முன்பு அவசரமாக ஏக்நாத் ஷிண்டே சதாராவில் உள்ள தனது சொந்த ஊருக்கு புறப்பட்டு சென்றுவிட்டார்.

நேற்று முன் தினம் பா.ஜ.க தன்னிச்சையாக வரும் 5ம் தேதி அமைச்சரவை பதவியேற்கும் என்று அறிவித்தது. இதையடுத்து நேற்று அவசர அவசரமாக ஏக்நாத் ஷிண்டே தனது சொந்த ஊரில் இருந்து மும்பை திரும்பினார். அவர் நிருபர்களுக்கு அளித்த பேட்டியில், ''முதல்வர் விவகாரத்தில் பா.ஜ.க தலைமை எடுக்கும் எந்த முடிவுக்கும் சிவசேனா ஆதரவு கொடுக்கும்'' என்றார். சிவசேனாவிற்கு உள்துறை அமைச்சர் பதவி கேட்கப்படுவதாகவும், மகன் ஸ்ரீகாந்த் ஷிண்டேயிக்கு துணை முதல்வர் பதவி கேட்கப்படுவதாகவும் செய்தி வெளியாகி இருப்பது குறித்து கேட்டதற்கு, அதனை மறுக்காத ஏக்நாத் ஷிண்டே, பேச்சுவார்த்தை நடந்து கொண்டிருக்கிறது என்றும், அதிகார பகிர்வில் இருக்கும் பல்வேறு சிக்கல்கள் பேச்சுவார்த்தை மூலம் தீர்வு காணப்படும் என்றும், பேச்சுவார்த்தை இன்று அல்லது நாளை நடைபெறும் என்றும் தெரிவித்தார்.

அதிகார பகிர்வு தொடர்பாக முதல் கூட்டம் டெல்லியில் அமித் ஷா முன்னிலையில் நடந்துள்ளது. இரண்டாவது கூட்டம் மும்பையில் நடைபெறும். மகாராஷ்டிரா நலனை கருத்தில் கொண்டு அதில் முடிவு எடுக்கப்படும் என்றும் தெரிவித்தார். முதல்வராக தேவேந்திர பட்னாவிஸை பா.ஜ.க எம்.எல்.ஏ.க்கள் ஓரிரு நாளில் கூடி தேர்வு செய்வார்கள் என்று பா.ஜ.க தலைவர் ஒருவர் தெரிவித்தார்.

பா.ஜ.க மாநில தலைவர் சந்திரசேகர் பவன்குலே இது குறித்து அளித்த பேட்டியில், ''பா.ஜ.க தலைமை முதல்வர் யார் என்பது குறித்து முடிவு செய்தவுடன் பா.ஜ.க எம்.எல்.ஏ.க்கள் கூடி அவரை தேர்வு செய்வார்கள்'' என்றார். அதிகார பகிர்வில் இருக்கும் கருத்து வேறுபாடு குறித்து சிவசேனா எம்.எல்.ஏ.குலாப்ராவ் அளித்த பேட்டியில், ''தேசியவாத காங்கிரஸ்(அஜித் பவார்) மஹாயுதி கூட்டணியில் சேராமல் இருந்திருந்தால் சிவசேனாவில் இருந்து 90 முதல் 100 பேர் எம்.எல்.ஏ.க்களாக தேர்ந்தெடுக்கப்பட்டு இருப்பார்கள். தேசியவாத காங்கிரஸ் கட்சியை கூட்டணியில் சேர்த்தபோது எங்களிடம் கேட்கவில்லை'' என்றார். ஏக்நாத் ஷிண்டே உள்துறை அமைச்சகத்துடன், மகனுக்கும் துணை முதல்வர் பதவி கேட்பதாக புதிய தகவல்கள் வெளியாகி இருக்கிறது.

அதேசமயம் மும்பை ஆசாத் மைதானத்தில் அமைச்சரவை பதவியேற்பதற்கான ஏற்பாடுகள் தொடங்கி நடந்து வருகிறது. அமைச்சரவை பதவியேற்பு நிகழ்ச்சியில் பிரதமர் நரேந்திர மோடி பங்கேற்பதை பிரதமர் அலுவலகம் உறுதி செய்து இருக்கிறது. நாக்பூரில் தேவேந்திர பட்னாவிஸை முதல்வராக சித்தரித்து ஆங்காங்கே பேனர்கள் வைக்கப்பட்டுள்ளது. ஆனால் பா.ஜ.க தலைமை இவ்விவகாரத்தில் தொடர்ந்து மவுனம் காத்து வருகிறது. தேவேந்திர பட்னாவிஸ் முதல்வராக அஜித் பவார் முதல் ஆளாக தனது ஆதரவை தெரிவித்துள்ளார். இப்பதவிக்கு பா.ஜ.கவில் தேவேந்திர பட்னாவிஸ் பெயர்தான் முன்னிலையில் இருக்கிறது என்று பா.ஜ.க தலைவர்களும் தெரிவித்துள்ளனர்.