மகாராஷ்டிரா முதல்வர் பதவியை விட்டு கொடுத்த ஷிண்டே; அமைச்சரவையில் சிவசேனாவுக்கு தாராளம் காட்டும் பாஜக

மகாராஷ்டிராவில் நடந்த சட்டமன்றத் தேர்தலில் பா.ஜ.க தலைமையிலான ஆளும் கட்சி கூட்டணி 230 தொகுதிகளில் வெற்றி பெற்றுள்ளது. ஆனால் முதல்வர் விவகாரத்தில் தனது பதவியை விட்டுக்கொடுக்க முடியாது என்று ஏக்நாத் ஷிண்டே பிடிவாதம் பிடித்தார். இதனால் ஆட்சியமைப்பதில் தாமதம் ஏற்பட்டது. தற்போது ஏக்நாத் ஷிண்டே தனது முதல்வர் பதவியை விட்டுக்கொடுக்க சம்மதித்துள்ளார். பா.ஜ.க தலைமை எடுக்கும் முடிவுக்கு கட்டுப்படுவதாக ஏக்நாத் ஷிண்டே நேற்று அறிவித்தார். இதையடுத்து தேவேந்திர பட்னாவிஸை முதல்வராக்க பா.ஜ.க தீவிரம் காட்டி வருகிறது. முதல்வர் பதவியை விட்டுக்கொடுத்ததற்காக ஏக்நாத் ஷிண்டேயின் சிவசேனாவிற்கு கூடுதல் அமைச்சர் பதவி கொடுக்க பா.ஜ.க முடிவு செய்துள்ளது.

முக்கிய துறைகளான பொதுப்பணித்துறை, நகர்ப்புற மேம்பாட்டுத்துறை, நீர்வளத்துறை உட்பட 12 கேபினட் அமைச்சர் பதவிகள் கொடுப்பதாக ஏக்நாத் ஷிண்டேயிடம் பா.ஜ.க வாக்குறுதி கொடுத்திருக்கிறது. மஹாயுதி கூட்டணியில் இடம் பெற்று இருக்கும் அஜித் பவார் தலைமையிலான தேசியவாத காங்கிரஸ் கட்சிக்கு 9 அமைச்சர் பதவிகள் கொடுக்க முடிவு செய்யப்பட்டுள்ளதாக பா.ஜ.க வட்டாரங்கள் தெரிவித்துள்ளன. அமைச்சரவையில் மொத்தம் 43 பேரை வைத்திருக்க முடியும். இதில் முதல்வர் பதவி உட்பட பாதி அமைச்சர் பதவிகளை தனக்கு வைத்துக்கொள்ள பா.ஜ.க முடிவு செய்திருக்கிறது.

இரண்டு துணை முதல்வர் பதவிகள் ஏற்படுத்த திட்டமிட்டுள்ள பா.ஜ.க, அதில் ஒன்றை அஜித் பவார் கட்சிக்கு கொடுக்க இருக்கிறது. மற்றொரு துணை முதல்வர் பதவியை ஏக்நாத் ஷிண்டேயின் சிவசேனாவிற்கு கொடுக்க திட்டமிட்டுள்ளது. அதோடு அமைச்சரவையில் ஏக்நாத் ஷிண்டே சேர வேண்டும் என்றும், துணை முதல்வர் பதவியை ஏற்கவேண்டும் என்றும் பா.ஜ.க கேட்டுக்கொண்டது. ஆனால் ஏற்கெனவே மராத்தா இட ஒதுக்கீடு போராட்டம், இதர பிற்படுத்தப்பட்ட வகுப்பினரின் போராட்டத்தால் மகாராஷ்டிரா கலகலத்து இருக்கிறது. எனவே அஜித் பவார் ஏற்கெனவே மராத்தா சமுதாயத்தில் இருந்து துணை முதல்வராக பதவியேற்பதால் மற்றொரு துணை முதல்வர் பதவியை ஏக்நாத் ஷிண்டே கட்சியில் உள்ள தலித் சமுதாயத்தை சேர்ந்த சஞ்சய் ஷிர்சாத்திற்கு கொடுப்பது குறித்து ஏக்நாத் ஷிண்டே பரிசீலித்து வருகிறார்.

இது குறித்து பா.ஜ.க தேசிய செயலாளர் வினோத் தாவ்டே, மத்திய அமைச்சர் அமித் ஷாவைச் சந்தித்து பேச்சுவார்த்தை நடத்தி இருக்கிறார். அதோடு ஏக்நாத் ஷிண்டே முதல்வர் பதவியை விட்டுக்கொடுக்க முன் வந்ததற்கு பா.ஜ.க வரவேற்பு தெரிவித்துள்ளது. இது தொடர்பாக அக்கட்சியின் மாநில தலைவர் சந்திரசேகர் பவன்குலே அளித்த பேட்டியில், ''ஏக்நாத் ஷிண்டே மிகப்பெரிய முடிவு எடுத்திருக்கிறார். அதனை நாங்கள் மனப்பூர்வமாக வரவேற்கிறோம். அவரது முடிவை நினைத்து நாங்கள் பெருமைப்படுகிறோம். நாங்கள் முதல்வர் பதவிக்காக சண்டையிட்டுக்கொள்ளவில்லை. மகாராஷ்டிராவில் உள்ள 14 கோடி மக்களுக்காக போராடுகிறோம்'' என்றார்.