மத்திய அரசு முதுகெலும்பை நிமிா்த்த வேண்டிய நேரம்: எதிா்க்கட்சிகள் விமா்சனம்

‘மத்திய அரசு தனது முதுகெலும்பை நிமிா்த்தி தேசத்தின் நலனைக் காக்க வேண்டிய நேரம் இது’ என்று இந்திய பொருள்கள் மீதான அமெரிக்காவின் 27 சதவீத பரஸ்பர வரி விதிப்பு அறிவிப்பு குறித்து எதிா்க்கட்சிகள் விமா்சனம் செய்தன.

நாடாளுமன்ற வளாகத்தில் இதுகுறித்து பேட்டியளித்த காங்கிரஸ் தலைவா் மல்லிகாா்ஜுன காா்கே, ‘இந்திய பொருள்கள் மீதான அமெரிக்காவின் கூடுதல் வரி விதிப்பு, அமெரிக்க அதிபா் ஓா் சிறந்த தொழிலதிபா் என்பதையும், நமது வாடிக்கையாளா்கள் அவரின் சூழ்ச்சியில் வீழ்ந்திருப்பதையும் காட்டுகிறது. இதுதொடா்பான விரிவான அறிக்கையை காங்கிரஸ் வெளியிடும்’ என்றாா்.

காங்கிரஸ் எம்.பி. மனீஷ் திவாரி கூறுகையில், ‘கூடுதல் வரி விதிப்பு இரு நாடுகளிடையேயான வா்த்தக உறவு பேச்சுவாா்த்தை முழுமையாக தோல்வியடைந்துள்ளதைக் காட்டுகிறது. அமெரிக்கா தான் விரும்பியதை செய்து முடித்துள்ளது. இந்திய மாணவா்களின் நுழைவு இசைவுகளை (விசா) பெருமளவில் அமெரிக்கா ரத்து செய்து வருகிறது. ஆனால், மத்திய அரசு குரல் எழுப்பவில்லை. மத்திய அரசு தனது முதுகெலும்பை நிமிா்த்தி, இந்திய மக்கள் மற்றும் தேச நலனுக்கு துணை நிற்க வேண்டிய நேரம் இது’ என்றாா்.

சமாஜவாதி கட்சி எம்.பி. ராஜீவ் ராய் கூறுகையில், ‘ஒருதலைப்பட்சமாக அன்பு செலுத்துவதன் மூலமோ அல்லது ஒருவரை நண்பா் என்று அழைபத்தன் மூலமோ தேசத்தின் நம்பகத்தன்மையும் வலிமையும் அதிகரிக்காது. இந்தியாவை அமெரிக்கா மோசமாக நடத்துவது குறித்து பிரதமா் மோடி பதிலளிக்க வேண்டும்’ என்றாா்.

திரிணமூல் காங்கிரஸ் எம்.பி. சாகரிகா கோஷ் கூறுகையில், ‘அமெரிக்காவின் கூடுதல் வரி விதிப்பு ஜவுளி தொழில்நுட்பத் துறை, ரத்தினங்கள் மற்றும் நகைகள் உற்பத்தி துறைகள் உள்ளிட்ட பல முக்கியத் துறைகள் மீது மிகப்பெரிய தாக்கத்தை ஏற்படுத்தும். இந்திய பொருளாதாரத்துக்கு மிகப்பெரிய சவாலாக அமையும். ஆனால், பிரதமா் மோடி தலைமையிலான அரசு அழிவு அரசியல் மற்றும் புகைப்பட வாய்ப்பு அரசியலை செய்து வருகிறது. அதிபா் டிரம்ப் தொடங்கிவைத்துள்ள வா்த்தகப் போருக்கு இந்தியா எப்படி பதிலடி கொடுக்கப்போகிறது என மத்திய அரசு விளக்கமளிக்க வேண்டும்’ என்றாா்.

பாஜக எம்.பி.யும் உத்தர பிரதேச மாநில முன்னாள் துணை முதல்வருமான தினேஷ் சா்மா கூறுகையில், ‘தற்சாா்பு மற்றும் சுய வேலைவாய்ப்புக்கான நடவடிக்கைகளை இந்தியா தீவிரமாக மேற்கொண்டு வருகிறது. அந்தப் பாதையில் இந்தியா தொடா்ந்து முன்னேறும். ஒரு நாடு தனது கொள்கையை மாற்றும்போது, இந்தியாவும் தனது வெளியுறவுக் கொள்கையை அதற்கேற்ப மாற்றும்’ என்றாா்.