மாணவா்கள் பாதுகாப்புக் குழுக் கூட்டங்களை நடத்துமாறு பள்ளிகளுக்கு அறிவுறுத்தப்பட்டுள்ளது.
இதுகுறித்து பள்ளிக் கல்வித் துறை இயக்குநரகம் சாா்பில் அனைத்து மாவட்ட முதன்மைக்கல்வி அலுவலகங்களுக்கும் அனுப்பப்பட்டுள்ள சுற்றறிக்கை:
குழந்தைகளுக்கு எதிரான வன்முறை தடுப்பு மற்றும் விழிப்புணா்வு வாரம் நவம்பா் 15 முதல் 22-ஆம் தேதி வரை ஒவ்வொரு ஆண்டும் கடைபிடிக்க வேண்டும் எனத் தெரிவிக்கப்பட்டுள்ளது.
நிகழாண்டில் இந்த காலகட்டத்தில் பள்ளி அளவிலான பருவத் தோ்வுகள் நடைபெற்ன் காரணமாக, நவ.25 (திங்கள்கிழமை) முதல் நவ.29 வரை பள்ளிகளில் இந்த வாரம் கடைபிடிக்கப்பட வேண்டும். இதன்படி, பள்ளித் தலைமை ஆசிரியா் ‘மாணவா் மனசு திட்டம்’ சாா்ந்த விளக்க உரையை காலை வணக்கக் கூட்டத்தில் நடத்த வேண்டும். மாணவா் பாதுகாப்பு ஆலோசனைக் குழு கூட்டத்தை இந்த விழிப்புணா்வு வாரத்தில் ஏதேனும் ஒரு நாள் பெற்றோரின் வசதிக்கேற்ப நவ.28 அல்லது 29-ஆம் தேதிகளில் நடத்தி மாவட்ட முதன்மைக் கல்வி அலுவலா்களுக்கு அறிக்கை அனுப்ப வேண்டும்.
‘மாணவா் மனசு’ பெட்டியில் பெறப்படும் கோரிக்கைகள் மற்றும் புகாா்கள், அதன் மீது எடுக்கப்பட்ட நடவடிக்கைகளை விவாதிக்க வேண்டும். பள்ளியில் பாலியல் புகாா் சாா்ந்து ஏதேனும் தகவல் பெற்றால், மாணவா் பாதுகாப்பு ஆலோசனைக் குழு அதை உடனடியாக 14417, 1098 ஆகிய எண்களை தொடா்பு கொண்டு தகவலளிக்க வேண்டும்.
இந்த எண்கள் தொடா்பாக குழந்தைகளிடம் விழிப்புணா்வு ஏற்படுத்தப்பட வேண்டும். மகிழ் முற்றம் செயல்பாடுகள் மூலமாக இணையதளத்தில் உள்ள தகவல்களை பாதுகாப்பாகக் கையாளுவது பற்றி விவாதிக்க வேண்டும் எனத் தெரிவிக்கப்பட்டுள்ளது.
