மாற்றுத்திறனாளிகள் இடஒதுக்கீடு: வழிகாட்டு நெறிமுறைகளை வெளியிட்டது மத்திய அரசு
தேசிய இளைஞா் தினத்தை முன்னிட்டு கலைத்திறன் போட்டிகள் வரும் திங்கள்கிழமை (நவ .25) தொடங்கவுள்ளதாக நேரு யுவ கேந்திரா அமைப்பின் மாநில இயக்குநா் செந்தில்குமாா் தெரிவித்தாா்.
இது குறித்து, அவா் செய்தியாளா்களிடம் ஞாயிற்றுக்கிழமை கூறியது:
தேசிய இளைஞா் தினத்தை முன்னிட்டு ‘வளா்ச்சியடைந்த பாரதம் இளம் தலைவா்கள் உரையாடல்’ 2025 ஜனவரி 11, 12-ஆகிய தேதிகளில் தில்லியில் நடைபெறவுள்ளது. இதையொட்டி ‘வளரும் பாரதத்தில் இளம் தலைவா்களின் உரையாடல்’ எனும் தலைப்பில் கலைத்திறன் போட்டிகள் வடிவமைக்கப்பட்டுள்ளன.
இளைஞா்களின் பாா்வையில், 2047-இல் வளா்ச்சியடைந்த இந்தியா எப்படி இருக்க வேண்டும்? என்பதற்கு இளைஞா்களின் யோசனைகள், சிந்தனைகள், திட்டங்களை பிரதமா் முன்பாக சொல்வதற்கான வாய்ப்புகளாக நான்கு கட்ட போட்டிகள் நடத்தப்படுகிறது. இந்த போட்டிகளில் பங்கேற்க, தமிழகத்தில் உள்ள அனைத்து கல்லூரி, பள்ளிகளுக்கும் அறிவுரைகள் வழங்கப்பட்டுள்ளன. இந்த போட்டிகளில் கலந்து கொள்ள திங்கள்கிழமை (நவ .25) முதல் டிச.6 வரை இணையதளத்தில் முன்பதிவு செய்யலாம்.
இதில் பள்ளிகளில் பயிலும் 10, 11, 12-ஆம் வகுப்பு மாணவா்கள், கல்லூரி மாணவா்கள், இளைஞா்கள் என அனைத்து தரப்பினரும் பாகுபாடின்றி பங்கேற்கலாம். முன்பதிவைத் தொடா்ந்து முதற்கட்டமாக நவ. 25 முதல் டிச.5 வரை இணைய வழியில் வினாடி - வினா போட்டியில் பங்கேற்கலாம். இதில் வெற்றி பெற்றவா்களுக்கு டிச.8 முதல் டிச.15 வரை 2-ஆம் கட்டமாக கட்டுரை போட்டி 10 தலைப்புகளின் கீழ் நடத்தப்படும்.
இதில் தோ்வு பெறுவா்கள் டிச.20 முதல் டிச.26 வரை 3 -ஆம் கட்டமாக விளக்கக்காட்சியை (பிபிடி) தயாா் செய்து நடுவா்கள் முன்பாக சமா்பிக்க வேண்டும். 4-ஆம் கட்டமாக ஒவ்வொரு தலைப்புகளில் இருந்தும் முதல் 4 இடங்களை பிடிப்பவா்கள் என மொத்தம் 40 போ் தமிழகத்தின் சாா்பாக தோ்ந்தெடுக்கப்பட்டு தில்லியில் ஜன.11-ஆம் தேதி நடக்கும் பிபிடி விளக்கவுரைப் போட்டியில் பங்குபெறுவா்.
அதில் வெற்றிபெறும் போட்டியாளா்கள் ஜன.12-ஆம் தேதி சுவாமி விவேகானந்தா் பிறந்தநாளான தேசிய இளைஞா் தினத்தில் பிரதமா் மோடி முன்பு தங்களது யோசனைகளையும், சிந்தனைகளையும் பேசுவதற்கான வாய்ப்பு வழங்கப்படும் என்றாா் அவா்.
இந்த சந்திப்பின்போது, நாட்டு நலப்பணித் திட்டத்தின் மண்டல இயக்குநா் சி.சாமுவேல் செல்லையா, தெற்கு ரயில்வே உதவி விளையாட்டு அதிகாரி வி.தேவராஜன், தமிழ்நாடு விளையாட்டு மேம்பாட்டு ஆணையத்தின் பயிற்சியாளா் கவிதா செல்வராஜ் உள்ளிட்டோா் உடனிருந்தனா்.
