மாணவா் விடுதிகளின் தரத்தை மேம்படுத்த நடவடிக்கை: அமைச்சா் சிவ.வீ. மெய்யநாதன்

தமிழகத்தில் மாணவா் விடுதிகளின் தரத்தை மேம்படுத்த நடவடிக்கை எடுக்கப்பட்டுள்ளதாக தமிழக பிற்படுத்தப்பட்டோா் நலத்துறை அமைச்சா் சிவ. வீ. மெய்யநாதன் தெரிவித்தாா்.

திருவாரூரில் தமிழ்நாடு பிற்படுத்தப்பட்டோா் மிகவும் பிற்படுத்தப்பட்டோா் சிறுபான்மையினா் நலத்துறை மாணவா் விடுதி பணியாளா் நலச்சங்கம் சாா்பில் ஞாயிற்றுக்கிழமை நடைபெற்ற மாநில மாநாட்டில் சிறப்பு அழைப்பாளராகப் பங்கேற்று அவா் மேலும் பேசியது:

மாணவா் விடுதிகளில் சமையலா், காப்பாளா் உள்ளிட்ட பணியிடங்களை நிரப்ப வேண்டும் என வலியுறுப்பட்டது. இதுகுறித்து முதல்வரின் கவனத்துக்கு கொண்டு செல்லப்படும்.

ராமநாதபுரம், திண்டுக்கல், தூத்துக்குடி உள்ளிட்ட பகுதிகளில் 116 பேருக்கு சமையலா் பணி நியமன ஆணை, திங்கள்கிழமை (ஜன. 6) வழங்கப்பட உள்ளது. மேலும் ஆயிரத்துக்கும் மேற்பட்ட காலிப் பணியிடங்களை நிரப்புவது தொடா்பாக முதல்வரின் கவனத்துக்கு கொண்டு சென்று நடவடிக்கை எடுக்கப்படும். அதுபோல தூய்மைப் பணியாளா்கள் காலிப் பணியிடங்களும் விரைவில் நிரப்பப்படும்.

அடுத்தக்கட்டமாக எல்லா விடுதிகளிலும் கண்காணிப்பு கேமராக்கள் பொருத்தப்பட உள்ளன. இதற்கென தமிழக முதல்வா் ரூ. 10 கோடி நிதி ஒதுக்கி அரசாணை வெளியிட்டுள்ளாா். இதன்மூலம் தமிழகம் முழுவதும் உள்ள 1,090 விடுதிகளிலும் கண்காணிப்பு கேமராக்கள் பொருத்தப்படும்.

விடுதிகளின் பராமரிப்புக்காக முதல்கட்டமாக ரூ. 10 கோடி ஒதுக்கீடு செய்யப்பட்டுள்ளது. கூடுதலாக இன்னும் ரூ. 20 கோடி இரண்டு மாதத்தில் ஒதுக்கீடு செய்யப்படும் என்று முதல்வா் அறிவித்துள்ளாா் என்றாா்.

நிகழ்வில் சட்டப்பேரவை உறுப்பினா் பூண்டி கே. கலைவாணன் உள்ளிட்டோா் பங்கேற்றனா்.