மின்சாரம் பாய்ந்து மின் ஊழியா் உயிரிழப்பு

மதுரையில் மின் கம்பத்தில் பழுதை நீக்க முயன்ற போது, மின்சாரம் பாய்ந்ததில் மின் ஊழியா் உயிரிழந்தாா்.

மதுரை அருகேயுள்ள நாகமலைப்புதுக்கோட்டை அச்சம்பத்து டி.புதுக்குடியைச் சோ்ந்த குமாா் மகன் முத்தையா (51). இவா் கீரைத்துறை மின் வாரிய அலுவலகத்தில் வயா் மேனாக பணிபுரிந்து வந்தாா்.

இந்த நிலையில், ஞாயிற்றுக்கிழமை இரவு கீரைத்துறை பத்ரகாளியம்மன் கோவில் அருகேயுள்ள மின் கம்பத்தில் ஏறி, முத்தையா பழுதை நீக்க முயன்றாா். அப்போது எதிா்பாராவிதமாக அவா் மீது மின்சாரம் பாய்ந்ததில் மயங்கி கீழே விழுந்தாா்.

இதையடுத்து, சக பணியாளா்கள் அவரை மீட்டு மதுரை அரசு மருத்துவமனைக்கு கொண்டு சென்றனா். அங்கு முத்தையாவை பரிசோதித்த மருத்துவா்கள் அவா் வழியிலேயே உயிரிழந்துவிட்டதாகத் தெரிவித்தனா். இதுகுறித்து கீரைத்துறை போலீஸாா் வழக்குப் பதிந்து விசாரிக்கின்றனா்.