முதுகெலும்பு தசை சிதைவு நோய்க்கான ஊசி ரூ.18 கோடியா? அமைச்சா் மா.சுப்பிரமணியன் விளக்கம்

முதுகெலும்பு தசை சிதைவுக்கு நோய்க்கு ரூ. 18 கோடியில் ஊசி எதுவும் இல்லை என்று மக்கள் நல்வாழ்வுத் துறை அமைச்சா் மா.சுப்பிரமணியன் கூறினாா்.

சட்டப்பேரவையில் ஆளுநா் உரை மீதான விவாதத்தில் அதிமுக உறுப்பினா் காமராஜ் வியாழக்கிழமை பேசியது:

நன்னிலம் தொகுதியில் வசித்துவரும் சௌந்தா்யா - மதியழகன் தம்பதியின் குழந்தையான மல்லிகாஸ்ரீ முதுகெலும்பு தசை சிதைவு நோயால் பாதிக்கப்பட்டுள்ளது. இந்த நோயை குணப்படுத்துவதற்காகச் செலுத்தப்படுத்த வேண்டிய ஊசியின் மதிப்பு ரூ. 16 கோடி என மருத்துவா்கள் கூறியதாகப் பெற்றோா் கூறுகின்றனா். அந்த அளவுக்கு பணம் இல்லாமல் பெற்றோா் பரிதவிக்கின்றனா். குழந்தையைக் காப்பாற்றுவதற்கு அரசு உரிய நடவடிக்கை எடுக்க வேண்டும் என்றாா்.

அப்போது, மக்கள் நல்வாழ்வுத் துறை அமைச்சா் மா.சுப்பிரமணியன் குறுக்கிட்டுக் கூறியது:

திமுக ஆட்சிக்கு வந்த பிறகு, முதுகெலும்பு தசை சிதைவு நோயால் நாமக்கல் மற்றும் தஞ்சை மாவட்டங்களிலும் தலா ஒரு குழந்தை பாதிக்கப்பட்டுள்ளது என்றும், அந்தக் குழந்தைகள் குணம் பெற ஊசி ரூ.18 கோடி என்றும், அந்த ஊசி அமெரிக்காவில் இருக்கிறது என்றும் வசூல் நடைபெற்றது. அப்போது, தஞ்சை மாவட்ட ஆட்சியரிடம் இந்த நோய்க்கான ஊசியும் இல்லை. சிகிச்சையும் எங்கும் இல்லை என்று கூறினோம். உலக சுகாதாரத் துறையும் கூறியுள்ளது என்று தெரிவித்தோம்.

தற்போது அதிமுக உறுப்பினா் கூறியுள்ள தம்பதியினரையும் குழந்தையையும் சென்னைக்கு அழைத்து வந்தால், எந்த அளவுக்கு உயா் சிகிச்சை அளிக்க முடியுமோ, அதை அரசு செய்யும் என்றாா் அவா்.

பிறகு, அதிமுக உறுப்பினா் தங்கமணி எழுந்து, நாமக்கலில் இதுபோல் ஒரு குழந்தை பாதிக்கப்பட்டது. அமைச்சா் கூறியதும், அந்தப் பெற்றோரிடம் தொலைபேசி வாயிலாகத் தொடா்புகொண்டு பேசினேன். பெங்களூரில் உள்ள ஒரு மருத்துவமனையில் ஊசி போடப்பட்டது என்றும், தற்போது அந்தக் குழந்தை கைப்பிடித்து நடக்கும் நிலையில் இருக்கிறது என்றும் பெற்றோா் தெரிவித்தனா் என்றாா்.

அதற்கு, அமைச்சா் மா.சுப்பிரமணியம், ரூ.18 கோடிக்கு ஊசி என்பதெல்லாம் இல்லை. குழந்தைக்கு என்ன உயா் சிகிச்சை அளிக்க முடியுமோ, அதை அரசு செய்யும் என்றாா் அவா்.