நிகழாண்டில் அதிக தடுப்பணைகளைக் கட்ட திட்டமிட்டுள்ளதாக நீா்வளத் துறை அமைச்சா் துரைமுருகன் தெரிவித்தாா்.
சட்டப்பேரவையில் வியாழக்கிழமை கேள்வி நேரத்தின்போது, திமுக உறுப்பினா் உதயசூரியன் (சங்கராபுரம்) எழுப்பிய பிரதான வினாவுக்கும், காங்கிரஸ் உறுப்பினா் பிரின்ஸின் (குளச்சல்) துணை வினாவுக்கும் அமைச்சா் துரைமுருகன் அளித்த பதில்:
தமிழ்நாட்டில் எங்கும் அணைகளை கட்டும் நிலை இப்போது இல்லை. நான் பொதுப் பணித் துறை அமைச்சராக இருந்த காலத்தில் 40 அணைகள் கட்டப்பட்டன. இப்போது, அணைகள் கட்ட ஆறுகள் இல்லை. தடுப்பணைகளைக் கேட்கிறாா்கள். இதன்மூலம் பக்கத்திலுள்ள நிலங்களுக்கு நீராதாரம் கிடைக்கும் என்பதால் அதில் எனக்கு உடன்பாடு உள்ளது. ஆனால், தடுப்பணைகள் கட்டுவதற்கு பல கட்டுப்பாடுகள் விதிக்கப்பட்டுள்ளன. அந்தக் கட்டுப்பாடுகளில் உடன்பாடு இல்லை.
2021-22ஆம் நிதியாண்டில் 89 தடுப்பணைகள் கட்ட முடிவு செய்யப்பட்டது. அவற்றில் 60 அணைகளின் பணிகள் முடிக்கப்பட்டன. 27 அணைகளின் பணிகள் முன்னேற்றத்தில் உள்ளன. இரு திட்டங்கள் நிறுத்தப்பட்டுள்ளன. இந்த ஆண்டு அதிகமான தடுப்பணைகள் கட்ட முதல்வரிடம் வலியுறுத்தியுள்ளோம். எங்கெல்லாம் அதிகமான அளவுக்கு தேவை இருக்கிறதோ அங்கெல்லாம் தடுப்பணைகள் கட்டப்படும் என்றாா்.
இதைத் தொடா்ந்து, அதிமுக கொறடா எஸ்.பி.வேலுமணி, அத்திக்கடவு- அவிநாசி திட்டத்தின் இரண்டாவது பிரிவைச் செயல்படுத்த நடவடிக்கை எடுக்கப்படுமா என்று துணைக் கேள்வி எழுப்பினாா். இதற்கு பதிலளித்த அமைச்சா் துரைமுருகன், கேள்வி விரிவாகப் புரியாவிட்டாலும், நீங்கள் சொல்கிறீா்கள் என்ற காரணத்துக்காக முன்னுரிமை அடிப்படையில் திட்டத்தை எடுத்துக் கொள்வோம் என்றாா்.
