யமுனை நதிநீர் விவகாரத்தில் பாஜகவும், ஆம் ஆத்மியும் நாடகம் ஆடுகிறது: பிரமோத் திவாரி

தில்லியைப் பாதிக்கும் முக்கிய பிரச்னைகளைப் புறக்கணிக்கும் அதேவேளையில் யமுனை நதிநீர் தொடர்பான விவகாரத்தில் பாஜகவும், ஆம் ஆத்மியும் நாடகம் நடத்துவதாக காங்கிரஸ் தலைவர் பிரமோத் திவாரி கடுமையாக விமர்சித்துள்ளார்.

ஹரியாணாவிலிருந்து யமுனை நதியில் பாயும் நீரின் தரம் குறித்து தொடர்ச்சியான அரசியல் பரிமாற்றங்களுக்குப் பிறகு, திவாரியின் இந்த கருத்துக்கள் வந்துள்ளன.

தில்லிக்கு தண்ணீர் வழங்கும் யமுனை நதியில் ஹரியாணா மாநிலம் விஷத்தை வெளியேற்றுவதாகவும் அமோனியா எனப்படும் விஷம் கலந்திருப்பதை உறுதிப்படுத்தியதாகவும் கேஜரிவால் தெரிவித்திருந்தார். இந்த தகவல் தேசிய தலைநகரில் அரசியல் பரபரப்பை ஏற்படுத்தியது.

இதுபோன்ற நாடகங்களில் ஈடுபடுவதற்குப் பதிலாக, சாலைகளின் சிலை, சுத்தமான குடிநீர், நகரத்தில் நீர் தேங்குதல் போன்றவைகளை எவ்வாறு கையாளுவது போன்ற உண்மையான பிரச்னைகளில் அவர்கள் கவனம் செலுத்த வேண்டும். தில்லியில் மாசு ஏன் தொடர்ந்து அதிகரித்து வருகிறது. மேலும் முன்னாள் தில்லி முதல்வராக இருந்த ஷீலா தீக்ஷித்தின் பதவிக்காலத்தில் நீர் சுத்திகரிப்பு நிலையங்கள் ஏன் நிறுவப்படவில்லை என்பதை அவர்கள் விளக்க வேண்டும்.

நீர் சுத்திகரிப்பு உள்கட்டமைப்பு ஏன் உருவாக்கப்படவில்லை என்பதை பாஜக, ஆம் ஆத்மி கட்சிகள் விளக்க வேண்டும். ஷீலா தீக்ஷித் காலத்திலிருந்து, புதிய ஆலைகள் எதுவும் நிறுவப்படவில்லை. இந்த பிரச்னைகளை தீர்க்க இரு கட்சிகளும் தவறிவிட்டதாக திவாரி விமர்சித்தார்.

உத்தரப் பிரதேசத்தில் சங்கமத்தில் நடந்த மகா கும்பமேளாவின் போது ஏற்பட்ட கூட்ட நெரிசலில் 30 பேர் கொல்லப்பட்டதற்குப் பதிலளிக்கும் விதமாக, குழப்பத்திற்கு பாஜக தலைவர்கள் பொறுப்பேற்க வேண்டும்.

சங்கத்தில் ஏற்பட்ட கூட்ட நெரிசல் ஒரு விபத்து அல்ல, தவறான நிர்வாகத்தின் விளைவாகும். பாஜக அமைச்சர்களும் தலைவர்களும் அதை ஒரு சுற்றுலாத் தலமாக மாற்றி, தேவையற்ற குழப்பத்தை ஏற்படுத்தினர். பலர் பாதுகாப்பை உறுதி செய்வதை விடப் புகைப்படம் எடுப்பதிலும் சுற்றுலாவை அனுபவிப்பதிலும் அதிக ஆர்வம் காட்டினர் என்பது தெளிவாகத் தெரிந்தது என்று அவர் குற்றம் சாட்டினார்.