ஓடும் ரயிலில் சிறுமிக்கு பாலியல் தொல்லை அளித்த ராணுவ வீரருக்கு 8 ஆண்டுகள் சிறை தண்டனை விதித்து வேலூா் போக்ஸோ நீதிமன்றம் தீா்ப்பளித்துள்ளது.
உத்தர பிரதேச மாநிலம் ஆக்ரா திகருவாடா கிராமத்தைச் சோ்ந்த யோகேந்திர சிங் பயில்வாா் (32). இவா் நீலகிரியில் வெலிங்டன் ராணுவக் கல்லூரியில் பணியாற்றி வந்தாா். கடந்த 2018-ஆம் ஆண்டு ஜனவரி 22-ஆம் தேதி கோவையிலிருந்து திருப்பதிக்கு செல்ல திட்டமிட்ட இவா், திருவனந்தபுரத்திலிருந்து ஹைதராபாத் வரை சென்ற ரயிலில் பயணம் செய்தாா். அவா் சென்ற பெட்டியில் கேரள மாநிலம் காயக்குளத்தைச் சோ்ந்த ஒருவா் தனது 13 வயது மகள், குடும்பத்தினருடன் பயணித்துள்ளாா்.
நள்ளிரவில் அந்த சிறுமிக்கு, யோகேந்திரசிங் பயில்வாா் பாலியல் தொல்லை கொடுத்துள்ளாா். இதனால் சிறுமி கூச்சல் போட்ட நிலையில், அவரை சக பயணிகள் பிடித்து காட்பாடி ரயில்வே காவல் நிலையத்தில் ஒப்படைத்தனா். இதுதொடா்பான புகாரின்பேரில் போலீஸாா் வழக்குப்பதிவு செய்து ராணுவ வீரா் யோகேந்திரசிங் பயில்வாரை கைது செய்தனா்.
இந்த வழக்கு விசாரணை வேலூா் போக்ஸோ சிறப்பு நீதிமன்றத்தில் நடைபெற்று வந்தது. இந்த வழக்கில் யோகேந்திரசிங் பயில்வாா் மீதான குற்றச்சாட்டுகள் உறுதியான நிலையில் கடந்த 26-ஆம் தேதியே தீா்ப்பு வழங்கப்பட இருந்தது. எனினும், அன்று யோகேந்திரசிங் நீதிமன்றத்தில் ஆஜராகாததால் அவருக்கு பிடியாணை பிறப்பிக்கப்பட்டு, நீதிமன்றத்தில் சரணடைய ஒருநாள் அவகாசம் வழங்கப்பட்டது. எனினும் அவா் நீதிமன்றத்தில் ஆஜராகவில்லை.
இதையடுத்து, யோகேந்திரசிங் பயில்வாருக்கு பெண்கள் துன்புறுத்தலை தடுக்கும் சட்ட பிரிவின் கீழ் 3 ஆண்டுகளும், ரூ.10,000 அபராதமும், கட்டத் தவறினால் மேலும் 6 மாத சிறையும், பாலியல் குற்றங்களில் இருந்து குழந்தைகளை பாதுகாத்தல் சட்டம் (போக்ஸோ) பிரிவின் கீழ் 5 ஆண்டுகள் சிறையும் ரூ.25,000 அபராதமும், தொகையை கட்ட தவறினால் கூடுதலாக ஓராண்டு சிறை தண்டனை விதித்தும் நீதிபதி சிவக்குமாா் வியாழக்கிழமை தீா்ப்பளித்தாா்.
