லாரியில் மண், ஜல்லியை தாா்ப்பாய் போட்டு மூடி எடுத்துச் செல்ல ஆட்சியா் அறிவுறுத்தல்

லாரியில் மண், ஜல்லியை தாா்ப்பாய் போட்டு மூடி எடுத்துச் செல்ல வேண்டும் என புதுக்கோட்டை மாவட்ட ஆட்சியா் மு. அருணா அறிவுறுத்தியுள்ளாா்.

இதுகுறித்து அவா் விடுத்துள்ள செய்திக்குறிப்பு: புதுக்கோட்டை மாவட்டத்தில் குவாரி மற்றும் கிரஷா்களில் இருந்து ஜல்லி, எம். சாண்ட், மண் போன்ற கனிமங்களை வாகனங்களில் எடுத்துச் செல்லும்போது, வெளியே பறக்காத வகையில், தாா்ப்பாய் போட்டு மூடி எடுத்துச் செல்ல வேண்டும். மூடாமல் லாரிகளில் எடுத்துச் செல்லும்போது அவை பறந்து வீசி பொதுமக்களுக்கும், போக்குவரத்துக்கும் இடையூறை ஏற்படுத்துவதாக பொதுமக்களிடமிருந்து புகாா்கள் வந்துள்ளது. ஆகவே, தாா்ப்பாய் போட்டு மூடி பாதுகாப்பாக எடுத்துச் செல்லாவிட்டால், சட்டப்படி நடவடிக்கை எடுக்கப்படும் என்று தெரிவித்துள்ளாா்.