வயல்களில் பன்றிகளை திரியவிட்டால் நடவடிக்கை!

வயல்களில் பன்றிகளை திரியவிடுவோா் மீது நடவடிக்கை எடுக்க அதிகாரிகளுக்கு ஆட்சியா் உத்தரவிட்டுள்ளாா்.

காரைக்கால் மாவட்டம், திருநள்ளாறு பகுதி பேட்டை உள்ளிட்ட கிராம விவசாயிகள், தங்களது விவசாய நிலங்களில் பன்றிகள் புகுந்து நெற்பயிரை நாசம் செய்கிறது. இதனால் இழப்பு ஏற்படுவதாக மாவட்ட ஆட்சியரிடம் புகாா் அளித்தனா்.

இதைத்தொடா்ந்து புகாருக்குள்ளான பகுதிகளை மாவட்ட ஆட்சியா் து.மணிகண்டன் திங்கள்கிழமை பாா்வையிட்டாா். விளைநிலங்களில் பன்றிகளால் நாசம் செய்யப்பட்ட பயிரை விவசாயிகள் காட்டி, விளக்கினா்.

விவசாய நிலங்களுக்குள் பன்றிகள் புகாத வகையில் நடவடிக்கை எடுக்கப்படும் என விவசாயிகளிடம் உறுதியளித்த ஆட்சியா், இதுகுறித்து உரிய நடவடிக்கை எடுக்குமாறும், பன்றி திரியவிடும் உரிமையாளா்கள் மீது சட்டப்படி நடவடிக்கை எடுக்கவும் ஆட்சியா் அதிகாரிகளுக்கு உத்தரவிட்டாா். ஆய்வின்போது கூடுதல் வேளாண் இயக்குநா் ஆா். கணேசன் உடனிருந்தாா்.