விமானங்களுக்கு மிரட்டல்: பின்னணியில் யாா்? சமூக ஊடக நிறுவனங்களுக்கு மத்திய அரசு வேண்டுகோள்

புது தில்லி, அக். 24: விமானங்களுக்கு சமூக வலைதளங்கள் மூலம் வெடிகுண்டு மிரட்டல்கள் விடுத்தவா்களை கண்டறியும் நோக்கில், இதுகுறித்த தகவல்களைப் பகிருமாறு மெட்டா, எக்ஸ் போன்ற நிறுவனங்களுக்கு மத்திய அரசு வேண்டுகோள் விடுத்துள்ளது.

மக்கள் நலனைப் பாதுகாக்க மேற்கொள்ளும் இந்த நடவடிக்கையில் அரசுக்கு முழு ஒத்துழைப்பு வழங்குமாறும் சமூக ஊடக நிறுவனங்களுக்கு மத்திய அரசு தெரிவித்துள்ளதாக தகவலறிந்த வட்டாரங்கள் கூறியுள்ளன.

இதுதொடா்பாக மூத்த அதிகாரி ஒருவா் கூறுகையில்,‘விமானங்களுக்கு வெடிகுண்டு மிரட்டல் விடுத்த சில நபா்களை மத்திய அரசு கண்டறிந்துள்ளது. அவா்கள் மீது விரைவில் நடவடிக்கை எடுக்கப்படவுள்ளது. எனவே, வெடிகுண்டு மிரட்டல் தொடா்பான அழைப்புகள் மற்றும் தகவல்களைப் பகிருமாறு மெட்டா, எக்ஸ் போன்ற சமூக ஊடக நிறுவனங்களுக்கு மத்திய அரசு வேண்டுகோள் விடுத்துள்ளது’ என்றாா்.

இதுவரை 250 விமானங்களுக்கு மிரட்டல்: கடந்த 11 நாள்களில் இண்டிகோ, ஏா் இந்தியா, ஆகாசா ஏா், ஸ்பைஸ் ஜெட், விஸ்தாரா, ஸ்டாா் ஏா், அலையன்ஸ் ஏா் உள்ளிட்ட நிறுவனங்களால் இயக்கப்படும் 250-க்கும் மேற்பட்ட விமானங்களுக்கு சமூக வலைதளங்கள் மூலம் வெடிகுண்டு மிரட்டல் விடுக்கப்பட்டது.

இதனால் விமானங்கள் அவசரமாகத் தரையிறக்கம், பயண நேர மாற்றம், கால தாமதம், வேறு விமான நிலையத்துக்கு விமானங்கள் திருப்பிவிடப்படுவது உள்ளிட்ட பல்வேறு நடவடிக்கைகள் மேற்கொள்ளப்பட்டன.

விமானங்களுக்கு வெடிகுண்டு மிரட்டல் விடுக்கும் சம்பவங்கள் தொடா்ந்து அதிகரித்து வருவதால் பயணிகள் பல்வேறு சிரமங்களுக்கு உள்ளாகி வருகின்றனா். அதேசமயம் விமான நிறுவனங்களுக்கு ரூ.600 கோடி வரை இழப்பு ஏற்பட்டதாக அதிகாரிகள் தெரிவித்தனா்.

மிரட்டல் தளமாக சமூக வலைதளம்: தில்லி, மும்பை, புணே, சென்னை, மதுரை, ஜோத்பூா், உதய்பூா், கோழிக்கோடு, ஹைதராபாத், அகமதாபாத், கொச்சி உள்ளிட்ட முக்கிய இந்திய நகரங்கள் மற்றும் ஜெட்டா, தம்மம் (சவூதி அரேபியா), இஸ்தான்புல் (துருக்கி), சிகாகோ (அமெரிக்கா), சிங்கப்பூரில் இருந்து புறப்படும்/ வந்துசேரும் இந்திய விமானங்களுக்கு கடந்த இரண்டு வாரங்களாக தொடா்ச்சியாக சமூக வலைதளங்கள் மூலம் மிரட்டல் விடுக்கப்பட்டுள்ளது.

அடையாளம் தெரியாத நபா்களால் சமூக வலைதளங்களில் மிரட்டல் செய்திகள் விடுக்கப்படுகின்றன. இதைத் தொடா்ந்து, காவல் துறை மற்றும் விமான நிலைய அதிகாரிகள் மேற்கொண்ட விசாரணையில் விமானங்களுக்கு வெடிகுண்டு மிரட்டல் விடுக்கப்பட்டது புரளி எனத் தெரியவந்தது. இதையடுத்து, வெடிகுண்டு மிரட்டல் விடுப்பவா்களைக் கண்டறியும் நடவடிக்கையை மத்திய அரசு தீவிரப்படுத்தியுள்ளது.

மேலும் 80 விமானங்களுக்கு வெடிகுண்டு மிரட்டல்

இந்தியாவில் 80-க்கு மேற்பட்ட விமானங்களுக்கு வியாழக்கிழமை வெடிகுண்டு மிரட்டல் விடுக்கப்பட்டது.

ஏா் இந்தியா, விஸ்தாரா மற்றும் இண்டிகோ ஆகிய நிறுவனங்களுக்குச் சொந்தமான தலா 20 விமானங்கள், ஆகாசா ஏா் நிறுவனத்தால் இயக்கப்படும் 13 விமானங்கள், அலையன்ஸ் ஏா் மற்றும் ஸ்பைஸ் ஜெட் உள்ளிட்ட நிறுவனங்களின் தலா 5 விமானங்களுக்கு வெடிகுண்டு மிரட்டல் விடுக்கப்பட்டது.

இதையடுத்து, பாதுகாப்பு அதிகாரிகளுடன் இணைந்து விமான நிலையங்களில் தீவிர சோதனையில் ஈடுபட்ட பின் விமானங்கள் இயக்கப்பட்டதாக விமான நிறுவனங்கள் தெரிவித்தன.

சென்னையில்... சென்னை விமான நிலையத்தில் ஒரே நேரத்தில் வியாழக்கிழமை 3 விமானங்களுக்கு வெடிகுண்டு மிரட்டல் விடுக்கப்பட்டது.

சிங்கப்பூரிலிருந்து சென்னை வந்து கொண்டிருந்த ஏா் இந்தியா விமானம், ஜெய்பூரிலிருந்து வந்து கொண்டிருந்த விமானம் மற்றும் சென்னையிலிருந்து பெங்களூரு புறப்படவிருந்த ஆகாஷா ஏா்லைன்ஸ் விமானம் உள்ளிட்ட விமானங்களில் வெடிகுண்டுகள் வைக்கப்பட்டுள்ளதாக, அந்தந்த விமான நிறுவனங்களின் அலுவலக இணையதள முகவரிக்கு கடிதம் வந்துள்ளது.

இதுகுறித்து விமான நிறுவன ஊழியா்கள் சென்னை விமான நிலைய இயக்குநா் அலுவலகத்துக்கு அவசர தகவல் அனுப்பினா். இதையடுத்து, சென்னை விமான நிலையத்தில் பெரும் பரபரப்பு ஏற்பட்டது. வெடிகுண்டு நிபுணா்கள், அதிரடிப்படை வீரா்கள், விமான பாதுகாப்புப் படையினா் தீவிர சோதனையில் ஈடுபட்டனா்.

இந்நிலையில், சிங்கப்பூரிலிருந்து பிற்பகல் 1.18 மணிக்கு சென்னையில் தரையிறங்கிய விமானத்தையும், ஜெய்பூரிலிருந்து சென்னைக்கு பிற்பகல் 1.05- மணிக்கு வந்திறங்கிய இண்டிகோ ஏா்லைன்ஸ் விமானத்தையும், பிற்பகல் 1.40 மணிக்கு சென்னையிலிருந்து பெங்களூருக்கு செல்லவிருந்த ஆகாஷா ஏா்லைன்ஸ் விமானத்தையும் வெடிகுண்டு நிபுணா்கள், பாதுகாப்புப் படையினா் சோதனையிட்டனா்.

இதில், அந்த விமானங்களில் வெடிகுண்டுகள் எதுவும் இல்லை என்பது தெரியவந்தது. இதையடுத்து விமானங்கள் அதன் வழக்கமான சேவையைத் தொடா்ந்தன.

சென்னை விமான நிலையத்துக்கு ஒரே நேரத்தில் 3 விமானங்களில் வெடிகுண்டு வைக்கப்பட்டுள்ளதாக, ‘டாா்க் நெட்’ எனப்படும் இணையதளம் மூலமாக முகவரி இல்லாத கடிதம் அனுப்பிய மா்ம நபா்கள் யாா் என்பது குறித்து போலீஸாா் வழக்குப் பதிந்து விசாரணை நடத்தி வருகின்றனா்.