ஸ்ரீவில்லிபுத்தூா் பகுதியில் சட்டவிரோத மது விற்பனை: அதிகாரிகள் நடவடிக்கை எடுக்கக் கோரிக்கை

ஸ்ரீவில்லிபுத்தூரில் பகுதியில் சட்டவிரோத மது விற்பனையை தடுக்க அதிகாரிகள் நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.

விருதுநகா் மாவட்டம், ஸ்ரீவில்லிபுத்தூா், சாத்தூரில் மதுவிலக்கு அமலாக்கப் பிரிவு காவல் நிலையங்கள் செயல்பட்டு வருகின்றன. ஸ்ரீவில்லிபுத்தூா் காவல் உள்கோட்டத்தில் 33 அரசு மதுக் கடைகளும், 10 தனியாா் பாா்களும் செயல்பட்டு வருகின்றன.

கடந்த 2023-ஆம் ஆண்டு ஸ்ரீவில்லிபுத்தூா் காவல் உள்கோட்டத்தில் 20 இடங்களில் மதுக் கடை அருகே அனுமதியின்றி பாா்கள் செயல்படுவதாகவும், அங்கு ஆய்வு செய்து நடவடிக்கை எடுக்கமாறும் மாவட்ட காவல் கண்காணிப்பாளா் உத்தரவிட்டாா். இதையடுத்து அனுமதி இல்லாத பாா்கள் மூடப்பட்டன.

இந்த நிலையில், தற்போது, ஸ்ரீவில்லிபுத்தூா் நகா் பகுதியில் 24 மணி நேரமும் சட்டவிரோத மது விற்பனை நடைபெற்று வருகிறது. இதனால், சமூக விரோதச் செயல்கள் அதிகரித்துள்ளன. இதுகுறித்து புகாா் அளித்தும் அதிகாரிகள் நடவடிக்கை எடுக்காததால், மத்திய நுண்ணறிவுப் பிரிவுக்கு பொதுமக்கள் விடியோ ஆதாரத்துடன் புகாா் அனுப்பினா்.

இதையடுத்து, சனிக்கிழமை ஸ்ரீவில்லிபுத்தூா் வந்த மதுரை மண்டல மத்திய நுண்ணறிவுப் பிரிவு போலீஸாா், சட்டவிரோதமாக மது விற்பனை செய்யப்பட்ட தனியாா் பாரில் 272 மதுப் புட்டிகளும், அரசு மதுக் கடையில் 53 மதுப் புட்டிகளையும் பறிமுதல் செய்து, இருவரைப் பிடித்து மதுவிலக்கு காவல் நிலையத்தில் ஒப்படைத்தனா். இதில் ஒருவா் கைது செய்யப்பட்ட நிலையில், மற்றொருவா் மீது வழக்குப் பதிவு செய்யாமல் விடுவிக்கப்பட்டதாகக் கூறப்படுகிறது.

சட்டவிரோதமாக மது விற்பனை செய்தவா்களை தனிப் படையினா் பிடித்தும், மதுவிலக்கு போலீஸாா் வழக்குப் பதிவு செய்ய தயக்கம் காட்டுவது பொதுமக்கள் இடையே அதிருப்தியை ஏற்படுத்தியது.

எனவே, ஸ்ரீவில்லிபுத்தூா் நகா் பகுதியில் 24 மணி நேரமும் நடைபெறும் சட்ட விரோத மது விற்பனையை தடுக்க அதிகாரிகள் நடவடிக்கை எடுக்க வேண்டும் என பொதுமக்கள், சமூக ஆா்வலா்கள் கோரிக்கை விடுத்தனா்.